頭條戲場——《PET PET當家2》我係貓奴睇到好興奮

        《PET PET當家》玩寵物歷險拯救同類,票房全球大收近9億美金,《PET PET當家2》延續首集角色,男角阿麥同大嚿之家有位BB新成員里安,而本是邪惡兔首領毛毛就變身正義毛毛隊長拯救動物,另外視阿麥為男友的寶珠為救兩人哎吔愛情結晶品「嗡嗡B」,而學習如何由一隻狗變成一隻貓,一套睇到好想出手摸嘅電影,得意又開心,可以減淡一啲怒火及傷痛,香港人加油。(下周四上映)

今集有一堆新角色,包括農場狗大佬雄雞,驚青白老虎,貓癡婆婆及阿麥新小主人里安等。動畫分三條故事線,包括阿麥變成「虎狗」,對小主人過份關注,呢樣唔做得,嗰樣唔可以,24小時完全監視,離開眼尾少少都會極度擔心,但好彩佢喺農場遇到雄雞,一次農場家庭之旅,阿麥成長了。

唔好再睇馬戲團

  上集邪惡嘅兔仔毛毛做盡壞事,之後有幸被小妹妹莫莉收養,從此變成可愛cosplay兔,主力扮演兔超人去拯救動物,有一日被西施狗阿花邀請加入絕密救白虎行動,要從殘暴馬戲團團長手上救走被虐打的白老虎。最後就係寶珠因為誤將阿麥心愛的玩伴「嗡嗡B」跌入全屋超過50隻貓嘅貓癡婆婆之家,「救B計劃」第一步就係要扮貓硬闖,於是佢請嚟又肥又寸又為食但有義氣嘅肥貓女欣宜幫拖教扮貓。

  動畫繼續屬搞笑歷險類,得意過癮又緊張,戲中貓貓出鏡率極高,作為資深貓奴睇得好興奮,啲衰貓真係好黐線好可愛。

撰文:廖思慧

hd