頭條戲場——《搖滾太空人》Taron Egerton上晒身

        介紹返,Elton John,一代搖滾巨星,全球暢銷歌手,曾推出38張金唱片及31張白金唱片級數的個人專輯,全球賣出逾3億隻大碟。其單曲《Candle in the Wind 1997》銷量超過3千3百萬,至今仍是史上最暢銷單曲的紀錄保持者。點解要介紹?因為見到連登有巴打話完全唔識佢,話晒係殿堂級歌手,有無搞錯?《搖滾太空人》是Elton John自傳電影,由陰功童年講到被背叛嘅盛年,無隱藏吸毒酗酒歷史,以歌舞片形式呈現Elton John一生。Taron Egerton如Elton John上身,歌好聽畫面華麗,令我可暫忘煙霧下及黃雨衣的傷心事。(剛上映)

        電影用了超過十年時間籌備,聽吓Elton John點講套戲,「從1960年我仲係細路開始,一直到1990年進入戒毒中心,嗰段成名嘅歷程唔平凡又有啲超現實。」他與同性伴侶兼電影監制David Furnish給予編劇Lee Hall超強自由創作空間,Elton John嘅歌唔需要順時序出現,亦不用迴避佢曾經吸毒及酗酒嘅成長經歷。當事人只有一點必須堅持:「一定要係音樂劇,因為音樂就係我嘅生命。」

  Elton John希望扮演他的演員不但形神俱似,亦要是個唱得之人,所以電影有別於一般的音樂傳記片採用幕後代唱,無錯,飾演Elton John嘅Taron Egerton由頭唱到尾,對Elton John仰慕已久嘅佢當年就是憑藉演繹偶像的《Your Song》才通過英國皇家戲劇藝術學院的面試取錄。雖然Taron有歌唱底子,他仍須花五個月練自彈自唱,苦練換來可以用自己方式演繹Elton John嘅多首名曲,仲可以親身到倫敦著名嘅Abbey Road Studios錄音,難怪Taron話絕對係佢演藝生涯中「最想狠狠地捏醒自己嘅時刻」。

  導演Dexter Fletcher前作是獲得多達五項奧斯卡提名及全球票房大豐收的《波希米亞狂想曲:搖滾傳說》,同樣是傳奇電影,我覺得《搖滾太空人》較為好睇。畢竟Elton John仍健在,可以老實面對自己歷史,故事更有血有肉更觸動人心。

撰文:廖思慧


hd