頭條戲場——《上流寄生族》暴雨下的人間樂與悲

        香港樓價連續九年冠絕全球,劏房愈劏愈細,原來韓國亦有窮人恩物,戲中主角,金家一家四口就住喺多塵又臭又Dirty嘅半地下屋,唯一嘅窗口望出去就係街嘅地下,日復日見到大量曱甴同醉酒佬小便。因為一嚿運財石,金家突然變成虛擬上流人,前半段幽默爆笑,中段膽戰心驚,尾段嚇鬼死我,屬荒誕諷刺黑色悲喜劇,全片無半句廢話,配樂極出色,必須要入場。(上映中)

《上流寄生族》是史上首部勇奪康城影展金棕櫚大獎的韓國電影,評審團九票一致通過,兩奪奧斯卡最佳導演的伊拿力圖表示,「係一部非常貼地嘅電影,又能不帶批判地揭露全球皆有嘅問題,精采又俐落。」電影在韓國本土票房亦大收。電影講述有錢人同窮L之間嘅故事,譽滿全球嘅大導演奉俊昊說:「我哋生活喺一個差距越嚟越大嘅時代,呢套係一部充滿韓國特色細節嘅電影,但同時亦包含全世界非常普遍嘅問題,對我好有意義。」

鵲巢鳩佔

  奉大導繼《韓流怪嚇》後,與影帝宋康昊四度合作,以超頂級黑色幽默探討社會貧富黑暗面。又懶又自卑嘅窮老竇金基澤(宋康昊飾)同老婆清淑(張惠珍飾)及大仔基佑(崔宇植飾)與細女姫晶(朴素丹飾)同住半地下屋,四人均屬無業,偶然靠摺Pizza外賣盒搵外快。因為老友好帶挈,考咗四次大學都失敗嘅基佑成功被跨國集團朴社長(李善均飾)嘅老婆(曹汝貞飾)聘請,擔任大女嘅英文補習老師,然後輪到偽造能力超強,讀美術嘅妹妹亦融入朴氏家中,金氏一家快樂倒數逃離窮L嘅生活。

出乎意料

  奉大導強調戲中無一個壞人,只係上流社會同低下階層之間嘅分歧同衝突,我唔認同,戲中當然有壞人,掠奪他人工作據為己有絕對是人渣行為,加上掠奪者及被掠奪者同是窮人,相煎何太急啊!電影前半段濃濃黑色幽默超好笑,中段前管家半夜按門鈴開始突然轉Tone,至一場超級大暴雨,風格愈變愈Dark,其實都是同一場雨,但對有錢人係雨後好太陽要感恩,對窮人就係無家可歸,影響完全天壤之別。

  窮L三父女暴雨下由山頂豪宅向下奔回家一幕,那種落荒而逃,如曱甴奔回坑渠一樣,一氣呵成簡潔有力,感受極深。

撰文:廖思慧

hd