頭條戲場——《蜘蛛俠:決戰千里》助你釋放負能量

        電影評價好兩極,我並非Fans,純粹因為唔想再睇新聞而入場輕鬆吓,因為連場大戰好精采,散場後負能量減少,亦明白到你見到嘅未必一定係真相,所有超級英雄都要經歷成長同覺悟,最緊要唔好灰心,年輕人,一個都不能少。(上映中)

        經歷《終局大戰》後8個月,Peter Parker(Tom Holland飾)回復學生身份,重新投入無拘無束嘅校園生活,仲睇中女同學MJ(Zendaya飾)。長期做英雄壓力大又辛苦,Peter決定同老友肥仔Ned(Jacob Batalon飾)及女神跟老師去歐洲旅行,佢仲諗住喺巴黎鐵塔前示愛,學生哥梗係去蒲去追女仔去飲去食啦,諗起就心痛。

  玩玩吓,神盾局Nick Fury局長(Samuel L. Jackson飾)突然蒲頭,通知佢地球正被地、風、水和火元素怪物侵襲,要佢肩負拯救世界嘅責任,佢有無得揀?當然無,仲要唔止對付怪物,兼要應付唔知係人定係鬼嘅「神秘人」Mysterio(Jake Gyllenhaal飾),不過怪物難搞都唔夠邪惡嘅人心恐怖。

  問Tom Holland點睇今集蜘蛛俠,佢話「Peter好似大個咗,但其實都係16歲嘅O靚仔。佢好急不及待同朋友一齊度假,但佢好快就知道無論自己身在何處,都要肩負超級英雄嘅責任。」再叫Tom Holland推介吓部戲,佢保證呢集動作場面規模更大,指《蜘蛛俠》上集仲可以低調對抗Vulture ,但呢次危機威脅全球,一觸即發,令佢無法隱藏身份秘密行事,好刺激咁話。溫馨提示:有兩個彩蛋,完場後唔好急急腳走呀。

撰文:廖思慧

hd