頭條戲場——《反斗奇兵4》多謝胡迪

        1995年播出的《反斗奇兵》是電影史上首部全電腦動畫長片,亦是當年全球最賣座電影No.1,唔經唔覺24年。一直是電影的死忠Fans,以為2010年相當完美的《反斗奇兵3》是系列壽終正寢之作,估唔到10年後會驚喜復活。驚喜原因係巴斯光年變配角,我嘅終生偶像三眼仔先生們完全係茄哩啡,好彩新角色傻仔叉、終極FFL阿得與賓尼、癲佬公爵同半邪惡嘉比嘉比非常出色,最重要我們的胡迪變成胡迪5.0,我為人人精神升級,經歷了隨時被毀嘅危機有所領悟,自己主人自己揀,多謝胡迪。(剛上映)

        開場無耐,經典主題曲《You've Got a Friend In Me》一播眼淚已經湧住出嚟,劇情講到新主人Bonnie開始返學,胡迪擔心而陪伴,再帶埋Bonnie人生首件勞作傻叉返歸,因為來自垃圾筒,叉仔一直覺得自己係垃圾拒絕做玩具而經常離家出走,十次離開一次成功,我為人人的胡迪警長當然唔會袖手旁觀。

  因為救叉,胡迪重見舊相好牧羊女寶貝,驚覺當年在燈罩下的瓷器寶貝變成有勇有謀兼好打得的戰士,多得佢,胡迪救叉行動才得以繼續,以及明白不能長期被決定,主人大了然後被冷落被拋棄無限Loop,人類可以揀玩具,玩具當然亦可番主人。超鍾意新角色,叉仔天真又口疏,唔好同佢講秘密;阿得與賓尼係終極FFL,諗就天下無敵,包辦大量高質笑料;癲佬公爵癲得好可愛,因為被遺棄而自卑,愛聽虛偽讚美說話,角色性格刻劃相當到肉。評語:不看一輩子白活。

撰文:廖思慧

hd