頭條戲場——《從前,有個荷里活》深黑色的童話故事

  電影片長162分鐘,前兩小時起伏不大,全靠兩大男神Leonardo DiCaprio及Brad Pitt的超班演技撐住,尾半小時是遲來的高潮,重頭戲有爆笑有血腥兼完全估佢唔到,屬導演Quentin Tarantino的簽名式風格。電影夾雜大量虛構及真實的電影畫面、人物及事件,假作真時真亦假,願曾經在某處發夢的你一切平安。(上映中)撰文︰廖思慧

  《從前,有個荷里活》是導演Quentin Tarantino寫了五年的故事,講到明是獻給童年荷里活的一封情書,一部發生喺1969年的黑色童話故事,導演表示:「我人生大部份時間住喺洛杉磯,包括1969年7歲嘅時候,好高興能夠講述一個已經喺洛杉磯同荷里活唔存在嘅故事,更高興可以睇到Leonardo及Brad Pitt呢對有魄力嘅組合能夠合作。」

里奧仔爆Seed

  首度合作的兩大男神Leonardo及Brad Pitt分別飾演虛構的50、60年代熱播電視連續劇明星Rick Dalton及其特技替身Cliff Booth,而Margot Robbie則飾演真實的荷里活明日之星Sharon Tate,三人故事線並非平排,Leonardo及Margot至尾段才會接合。Rick Dalton為過氣明星,一直希望有機會拍荷里活西部牛仔片紅遍世界。Rick Dalton性格好真,有嗰句講嗰句,經常感懷身世,郁啲就會情緒崩潰喊到豬頭,Leonardo如Rick上身,將嗰種黐黐地線又好識諗又瘋狂爆粗又好溫柔嘅角色演到入晒血,一段忘記對白嘅畫中畫場口,攞獎有望。

導演的回憶錄

  Quentin Tarantino表示,電影算是一個回憶錄。他補充:「1969年,我住喺洛杉磯嘅Alhambra。我記得當時上畫嘅電影,以及地區電視台播放嘅節目、記得當時嘅兒童主持、記得以前大家點樣坐喺自己架車聽電台、你會『聽死一個台』,然後將電台廣播聲開到爆錶,到廣告時都唔會收細音量。拍攝本片我要絞盡腦汁,激發回憶,記起當年嘅情況,絕對係一種樂趣。」


hd