金融High Tea——內銀股要慢食

        港股升開有條路,昨日繼續造好。大市氣氛改善,於是又有驚天預測現世,好似話恒指睇四萬點之類。

又有名嘴話睇四萬點

  有中環茶友同做過呢類預測嘅股市名嘴飲茶,佢問名嘴講到咁牛係咪堅O架,名嘴陰陰笑回應,話既然先前無乜人睇好,咁自己咪做好友囉,既然做好友,唔講大啲又點會有人服你!名嘴咁仲加料講多幾句,話好似銀行股,O依家市盈率好低啫,好似滙控(005)息率有5、6厘,如果美國加息1厘,佢息差增加,乜都唔使做就增加10億美元喎,所以唔怕唱好吓。

  語不驚人死不休,係做評論嘅先決條件,尤其O依家係網絡時代,人人講得激,如果唔激上加激,咁又點吸引人注意。我就話莫講4萬,3萬今年都好難見啦。

  名嘴講嘅目標指數其實唔使太認真對待,最重要係方向正唔正確,陸羽仁到O依家都唔會當正O依家大牛市去炒,頂多美國係大牛,香港只是牛仔,其實即係炒落後,最主要係炒港股估值低,而且第一季業績出來唔會太差,喺呢個大環境下,金融股無論係跨國嘅滙豐,又或者係內銀股,都受惠於股價唔貴,吸引資金流入。

  呢類型大股市值巨,郁動嘅方向慢,但就比較穩定,所以買呢類股票適宜慢食,即係買貨唔使急,沽貨都唔使急,想入嘅時候等佢低啲調整吓嘅時候先郁手,想沽嘅時候逐少逐少出貨,唔使一下沽清。

  好似呢兩日內銀股升得急,想上車可以等吓,如果手頭有貨,可以等佢高啲先沽,又或者先食小部份,留番啲貨係手,因為個市成交升左,動力增強,除非有突發壞消息,譬如美股急跌,否則個市應該仲會再上先至摸頂,太急沽清啲貨,咁就可能變左塘邊鶴。

  港股係唱好聲中,恒指終於重上24000關,收報24107點,升112點;國企指數收報10455點,上揚18點,成交仲有1076億元。藍籌股中重磅股騰訊控股(700)上揚2.6%,收報212元;受內地資金追捧嘅建行(939)再急升2.9%,收報6.45元,另外創左一人手高位嘅滙控(005)都升0.9%,收報68.3元。

  個市好番,連有「末日博士」之稱的麥嘉華都跳出來,話美國總統特朗普保護主義思維有利亞洲,甚至令亞洲區股市表現「跑贏全球」,香港及新加坡股市今年計及股息回報,回報率約15%,暫時成為贏家。末日博士喺接受CNN訪問時話,雖然特朗普在競選時揚言要對付中國,但中國根本不會害怕,因為中國會發展內需應對,同時,全球其他國家或地區將與中國有更緊密貿易。佢咁講好似將壞消息當作好消息走。

大行密手出報告推介

  第一季個市開緊party,大行出報告推介股票都密左手,好似摩根士丹利出報告將太平洋航運(2343)目標價大幅上調21.97%,由1.73元升至2.11元,予「增持」評級。報告指,太平洋航運為純乾散貨船經營商,將受惠行業進入上升周期受消息帶動,太平洋航運收漲7.2%,報1.49元。

  野村就有報告,話騰訊(700)近年積極加強旗下微信的功能,以及拓展手機遊戲業務,預期騰訊的廣告收入可持續增長,予「買入」評級,並將其目標價由230元調升至240元。內地紙價回升,玖龍紙業(2689)早前發盈喜,預期截至去年12月底止中期純利增逾45%。摩通就出報告看好玖紙盈利前景,因其毛利有望改善,予「增持」評級,目標價13元。

陸羽仁

hd