金融High Tea——揸舊科技股要留神

        美國議息前夕,港股先升後軟,觀望氣氛濃厚,唔同板塊嘅股份各自發展。雖然聯儲局好可能加息,但息口敏感嘅本地地產股繼續炒炒吓,反而有啲息口無咁敏感嘅科網股見左近期新低。

  美息預左會加,既然市場預左,咁加反而好過唔加,市場而家關心係加完呢次之後,聯儲局會點講,會唔會再加?加幅有幾密?有中環茶友話,如果美國經濟續有增長,加息無咁快見頂,咁息口敏感嘅舊經濟股可能唔係好得,咁係咪可以買吓傳統上覺得對利息無咁敏感嘅科網股。

網絡股鬥搶客股價尋底

  茶友呢個問題大路無錯,科網股好似搞手遊嘅IGG(799)呢個星期就爆上,不過,科技股急促發展咁多年,都有好多其實已經開始有飽和問題,譬如好似網絡商。最近網絡股好似和記電訊(215)、數碼通(315)股價下插,都創左新低,原因相信同行業打緊搶客戰有關。最近幾間網絡商搶學生客,實行賣大包,有好多世侄都話而家嘅新收費好抵。香港而家嘅電訊 用戶市場接近飽,搶客唔易創造出新收入。

  陸羽仁最近留意到日本科技投資股神、軟庫話事人孫正義分析,未來智能手機市場接近飽和,由高速增長變成平穩,同時消費者對網絡速度要求不斷提高,要適應呢啲要求,網絡商投資好大,但不易向用戶加價收回成本。

  孫正義講話的重點係要轉而投資人工智能,我地無工具投資咁尖端的東西,只睇到網絡商嘅生意係市場漸趨飽和下,逐漸難做。經過一輪調整,而家網絡商嘅股價數字都幾吸引,普遍有5厘左右息率,但前景睇淡,博反彈都只能炒吓短線。

  對於孫正義嘅分析,陸羽仁覺得好有道理,要記住呢個係個大趨勢,至於能否係大趨勢下能夠另覓商機,就考管理層應變,好似數碼通早前換左舵手,似乎想有力拓展金融科技,以適應市場變化。短線嚟講,市場期待蘋果推出新一代智能手機,如果想炒新機熱潮,最好都係等股價跌到殘先郁手博反彈,但唔好諗住做人世。

天安爆升一日收夠籌

  大市昨日待變格局,恒指收報23827,跌1點;中字股繼續跑贏,國企指數收報10315,漲56點,主力係內銀同個別內房,成交720億元。北水續流入推高中資金融股,建行(939)升1.6%,報6.35元;工行(1398)漲0.59%,報5.09元;中行(3988)升0.77%,報3.93元;平保(2318) 漲0.48%,報41.95元。

  資金輪流炒作內房股,個別內房股繼續出現一日升到夠食胡,天安(028)急升13%,報6.89元,佢呢個月差不多升左成5成,相信係憧憬佢業績有好嘢,佢係去6年6月止中期業績,公司擁有人應佔溢利為 5.13億港元,同比增幅 144.4%,即將派發嘅全年成績表應該唔差。

  天安早年係大陸買落唔少平地,近年大力開拓數碼城,呢啲項目一度受內地樓市放緩影響,但去年銷售好轉,個別項目大手出到貨,最煞食係深圳嘅數碼城項目,因為呢個項目規模特別大,重棍扑中,成為左股價有利因素。

  講到派成績表,先前話賣保險公司後會派獎品嘅大新金融(440)早排由高位調整後,可能又等緊好消息,所以開始有啲郁。

陸羽仁

hd