金融High Tea——唔做有線疑有後着

        美國議息前夕,氣氛都有啲緊張,美股同港股觀望氣氛都濃厚,主要唔係講加唔加息,而係跟住聯儲局諸公點睇利率前景。

美國加息次數或增加

        最近公佈美國嘅經濟數據,反映左通脹有可能嚟得比預期快,儲局三月份加息外,而家市場講緊係咪會調高加息次數,由三次增至四次,因為如果三月份已經加息,咁未來要仲有三季可以加息。現屆聯儲局加息都係四分一厘,有人話睇番過往格林斯潘做主席年代,加親都加半厘,幾步就已經達標,而家如果每次加四分一厘,如果通脹升得快,咁加息步伐可能追唔上,咁一係就加密啲,一係就加勁啲,lesser evil當然係加密啲,好過一劑落重藥啦,所以唔排除通脹若然嚟得急,今年加息次數會增加。

        由於咁嘅緣故,美股反應都有啲緊張,部份淡友仲出嚟吹淡風,油價、金價都回落,「三桶油」齊跌,中海油(883) 再插1.1%,報8.81元;中石油(857)跌0.5%,報5.66元;中石化(386)跌0.7%,報5.81元。

        美國加息理論上不利本港地產股,因為港美利息基本同步。雖然話香港而家水浸,初期美國加息,但港匯呢排已經跌低,資金若持續流走,香港都要跟住調高利率,咁對地產股都有壓力。係咁大氣候下,上個星期宣佈話考慮唔玩有線寬頻(1097)嘅九倉(004)同會德豐(020)股價就好強勢,會德豐昨日衝破60元大關,收報60.2元,大升3元,幅度高逾5%;九倉(004)都升1.6%,報68.7元,成表現最佳藍籌。

        雖然會德豐最近有盤開,叫做利好股價,但都無理由咁犀利,睇番副主席梁志堅係半年前仲係度減持,呢浸升勢相信佢都估唔到。有中環茶友解釋,就話九倉咁高調顯示決心放棄有線電視,觸發左市場對佢重組嘅憧憬。

        喺九倉宣佈唔玩有線嘅業績會上,九倉管理層披露話考慮分拆投資物業獨立上市,反映左重組嘅猜測不全是猜測。若然該系重組,作為大股東控股旗艦嘅會德豐,必然得益最大,所以股價呢幾日唔理美國議息,瘋狂上升。

惹長和重組翻版憧憬

        長期以來,九倉都會不時傳吓重組,皆因業內幾間公司有啲重疊,過去佢都曾經私有化聯邦同置業信邦等公司,簡化結構,而家話佢分拆物業上市,玩吓財技都唔出奇。

        太子爺吳宗權坐正做會德豐主席後,自然要度啲橋搞好公司表現,之後就見公司投地進取左。如今先出一招唔泵水玩有線,即係話俾大家聽,有線呢的年蝕3億的生意佢唔會做,咁一年就先執多3億。第二招係分拆出租物業以介紹形式上市,即係變相賣出租物業套現,如今物業有價,九倉手下持有的投資物業如用市值沽出股權,以那些物業所收租金計,隨只有2厘幾收益,沽2點幾巴仙回報的出租物業,將錢投番去有20巴仙以上回報的物業發展,咁公司收入咪會大增囉?

        你跟手問咁高價買地做物業發展有風險喎,佢又可以講,跌起上來收租物業一樣會跌,咁沽左收租物業,買入發展物業的地皮,風險無增加喎。嚴格而言,這不純粹是財技,只是把資源集中在回報最高的生意上去。

        由於唔知會德豐和九倉未來有何重組安排,咁同大股東坐埋一條船就最穩陣。睇番不久之前,華資一大動作係長江同和黃重組,變身成長和(001)同長地(1113),都叫好叫座,咁九倉系執吓資產都係合理安排,佢執有線只係令到外界對佢在商言商嘅取態留意多左,成為股價催化劑,未來應該仲有動作來。

        喺觀望美國聯儲局即將公佈的議息結果,港股周三受壓,恒指最多跌182點,午後曾倒升14點,收報23792,跌35點或0.15%;國企指數收報10272,跌42點,成交732億元。科網股繼續有炒作,未曾賺錢嘅美圖(1357)再創新高,午後曾飆14%,高見14.56元;現價14.22元,升11%,較上市價8.5元,累升67.5%。

陸羽仁

hd