金融High Tea——炒美圖要留意北水

        美國公佈加息當好消息炒,加上北水支持。以全周計,恒指累積上升741點或3.15%;國指累積上揚444點或4.41%。美股上周收市持平,杜指報20914點,跌19點;納斯達克指數收市報5901點,升不足1點;標普500指數收市報2378點,跌3點。

睇住騰訊嚟炒

  港股上周五略為高收,主要係騰訊一度高見222.8元,創歷史新高,前高位為去年9月份的220.8元,收報222元,升0.54%;另外北水繼續發威,建行(939)升0.31%,報6.44元;傳有重組的聯通(762)漲2.39%,報10.3元,成表現最佳藍籌。北水同時流入內險股,中國太平(966)升咗3.3%,報20元;財險(2328)升2.4%,報12.74元;人保(1339)升2%,報3.34元;國壽(2628) 升1%。

  恒指借住美國利息加定,會有一陣唔郁,炒上試吓高位。呢一浪最搶鏡係概念股美圖(1357),佢自從加入咗深港通名單後,股價即行因為內地資金猛買爆上。美圖而家仲未有錢賺,但由於坐擁大量用家,內地資金形容為騰訊(700)翻版,大力追捧,差唔多翻咗倍。

賠率1比28

  好多人都用過美圖秀秀,喺去年12月中上市,招股書介紹,公司程式喺上市前已在中國及海外超過11億個獨立設備上激活。為更好地滿足用戶對優質自拍照的需求,該公司於2013年推出專為自拍設計的美圖手機,這也是該公司實現變現的首個重大舉措。

  美圖至今都仲無乜錢賺,公司話自己嘅業務模式是以免費的創新產品及服務吸引大量用戶為首要目標,隨後,在該公司達到可觀規模時採取多種變現策略。公司相信,只要該公司的變現策略是基於與該公司用戶相關聯的產品及服務,該公司將有極大優勢為該公司的業務、用戶及業務夥伴創造價值。例如,了解到用戶對高品質自拍照的需求後,該公司於2013年推出了美圖手機業務。

  美圖受追捧,反映咗北水嘅心態。有中環茶友話,騰訊(700)當年只喺香港上市,好多大陸股民想買無得買,之後騰訊一直升不停。而家美圖雖然無錢賺,但佢有4、5億個客,大家期望佢好似當年嘅騰訊,可以慢慢建立到商業模式。騰訊上星期創新高後市值係21,039億元,美圖係760億元,兩者仲相差28倍。即係話博佢變成騰訊嘅賠率,而家係1賠28。

流通股價唔算多

  美圖而家有好大嘅客戶群,若然能夠諗到賺錢方法,咁佢就好似開到一個大金礦,但過程中係咪咁易成功呢?睇番美國嘅經驗,好似FB雄霸咗社交媒體市場,基本上其他同類型公司好難生存,佢亦會透過收購等方式去消滅對手,只有好似谷歌係唔同類型,先至可以各自發展,直至短兵相接。

  茶友話,炒美圖係炒兩樣嘢,一係炒佢能唔能夠變成另一隻騰訊,二係炒北水係咪繼續追捧。照睇而家佢仲炒得好癲,佢上市價8.5元,當時集資額46億元左右,現時股份流通量都係100億元,仲唔算係好多,如果北水繼續,唔排除會反覆衝浪。

薯片奶粉唔吸引 特首股概念欠奉

  呢個星期日就係特首投票日,上周電視辯論老實講都幾多冷場,薯片同奶粉都係味道麻麻,搞到大家剝花生興趣都係一般。

  今次特首電視辯論,據講搵咗中大同嶺大嘅民調中心請人入場,目標係請一、二百人。市民若想入場剝花生,唔可以主動申請,只能等運到,民調中心會用電話抽樣,不過唔好以為花生友好熱心,民調中心一個人每晚打四個小時,竟然成功邀約不足一位願意當日到場,花生友不易找,搵到民調中心失晒預算要蝕本。

辯論花生友甩底多

  除咗搵人難,聽講班花生友仲好多甩底,一百個應承咗嚟嘅,唔夠一半出席。唔知係咪薯片同花生性質有啲近,所以話出席者中,似乎薯粉居多,臨場打氣搞到好似成日都係薯片叔叔主場咁。

  上次特首選舉,有啲媒體就發掘吓有乜特首股。九七回歸時,特首股最明顯當然係董建華家族旗下嘅東方海外(316),結果佢真係不負所託,升到你唔信。老董之後到曾蔭權做特首,雖然好多人話佢同財團關係密切,但似乎就無乜特首股好炒。

董建華帶起東方海外

  到咗梁振英當選,有人話九倉(004)高調支持佢,所以買得過,不過九倉反而係振英宣佈唔做後,呢排先升得勁。o依家林鄭係大熱,但佢同商界關係一般,搞到大家似乎無乜心水,有人話家族有人幫手嘅信和(083)有得諗,茶友笑住話如果要博彩,係咪臨尾老闆高調出嚟撐林鄭嘅電盈(008)仲諗得過呢?

陸羽仁

hd