金融High Tea——炒雄安新區概念要執生

        港股昨日清明假期,大陸亦無市,之前兩日美股都係調整消化格局,周一晚杜指一度下挫過百點,但跌幅到收市時縮窄到只有13點。睇嚟特朗普廢除奧巴馬醫改無功而退,令市場對佢嘅新政降溫之餘,但經濟基調良好,仍能撐住指數。

        美股牛皮,反而港股本周一的4月開局唔錯,恒指收報24261,升左149點或;國企指數收報10314,漲40點,成交弱弱地,只有625億元。

        市場憧憬將獲注資的昆侖能源(135)更漲7.4%,報7.73元,成表現最佳藍籌,呢隻股沉寂多年,呢次炒作吓佢有改組。昆侖能源本身甚有來頭,阿媽係中石油集團,係中石油(857)未上市前,佢已經掛牌。後來中石油上左市,佢就變身專做天然氣項目。過去幾年由於全球能源價格下調,天然氣同樣受美國頁岩氣增產嘅衝擊,令佢無乜運行。

三桶油盈利料見底        

  3月份,內地三大石油巨頭陸續宣佈業績。初步睇佢地業績麻麻,但細睇大家去年都係先挫後揚,係去年下半年受惠油組減產、油價反彈,生意環境有改善,純利明顯增加。如果油價保持係現水平穩定下來,佢地今年業績應有明顯好轉,所以公佈後「三桶油」股價無因為業績數字唔太靚而跌落嚟。

        行業環境穩定除左令到之前急插的盈利見底,同時為行業結構整合提供左條件,所以市場開始憧憬改組注資嘅消息。

        睇番昆侖能源去年賺6.6億元,同比跌左55﹪,現價市盈率95倍,息率不足1﹪,但對呢類周期性、盈虧變動可以好大嘅股份嚟講,係低潮期嘅數字唔係最重要嘅參考數據。佢一年低價係5.2元,現價同3年高價仲係低左四成,唔可以叫做好貴。而家買佢係買母公司真係有改動作,係短炒唔係長揸,因為升得較多,真係改組時會回。

        至於下跌的藍籌,恒隆地產(101)則跌1.8%,報19.84元;蒙牛乳業(2319)更跌2.2%,報15.74元,為跌幅最大藍籌。

        放假前市場炒作另一個大概念係中國將在河北設雄安新區,有關係嘅京、津、冀概念股都上揚。內地官媒將呢個計劃形容為千年大計,券商認為可推動京津冀一體化,預料房地產、鋼鐵、交通運輸等行業將受益,引發資金追捧區內建材股金隅(2009),股價單日大漲左35%,報4.35元;天津港發展(3382)升16%,報1.53元;中國宏泰(6166)升11%,報3.5元;新天綠色(956)升12%,報1.68元。

        內地有意再設新區推動河北發展,專注搞高新科技,可能想整一個中國的矽谷出來,但呢啲大計唔係一時三刻可以見效。不過,自從興建全國高鐵完成後,內地需要新的經濟藍圖和火車頭,一帶一路需要外部環境配合,唔係中國一個可以自己搞掂。雄安新區的想法出現,令內部多左一個經濟願景,短期心理效應可能比實際影響仲大。

        通常炒作新區概念,無番十年八載見唔到真正成績,好似深圳發展都用左30多年,上海浦東初時炒完一轉,都要坐左艇10年,之後先至起飛。所以炒作地區發展嘅概念,最緊要係識得跟紅頂白,有得炒時要跟得快,無得炒時要走得快,好似水泥股金隅,股價一日升35%你又可唔可以期望今年盈利升35%呢?炒呢種概念要快閃。

中美元首會暫無期望

        但我自己就睇好雄安新區長線發展,不過就唔會咁快反映在具體公司的盈利上。內地好多人攞住一袋袋現金湧去雄安炒樓,阿爺話左唔准炒貴啲樓,以免發展科技產業時,進駐人員住唔起,所以現時已凍結紅安新區的房產過戶。我覺得炒作熱潮可能好快就會冷卻,但長線經濟發展計劃就可能成功。

  呢個星期,大市原先焦點係美國總統特朗普同國家主席習近平會見。大國接觸,宴無好宴、會無好會,都係講邊個有牙力,但元首出動得,照計事前應該傾好晒,大家見面交個朋友。

  特朗普唔知係係接見前出左醫改法案被逼撒回嘅瘀事,投資者怕佢對中國的姿態擺得好硬,市場對中美元首會晤都唔敢有太大寄望,不過咁樣可能仲好啲,因為無希望至少就無失望。雄安概念係呢個時候爆出嚟,正好填補左市場嘅空檔,所以大家都樂於先炒一轉。我建議炒雄安新區概念要執生,買中有胡就要食啦。

陸羽仁

hd