金融High Tea——內銀加監管腳仔軟

        中美股市唔見異樣,但港股就獨衰,恒指一開市就跌到收市,點解?陸羽仁覺得係同內地整頓金融業開始露出苗頭有關。

郭樹清新官上任三把火

  早一日陸羽仁提過內地保監主席項俊波受查,昨日內媒報道銀監會密集發佈包括《關於銀行業風險防控工作的指導意見》《關於開展銀行業「違法、違規、違章」行為專項治理工作的通知》《關於開展銀行業「監管套利、空轉套利、關聯套利」專項治理工作的通知》在內的監管政策。

        新任銀監會主席郭樹清正密集出招加強對內地銀行業的監管,分析認為,新政策要求針對過去兩年間快速膨脹的銀行同業借貸鏈條,以及銀行投資債券的資產端高速增長,將面對從嚴監管,可以話由郭樹清掀起一場監管風暴。

  內地分析認為今年勢必成為銀行體系的監管大年,銀行無論是在負債還是資產都將有針對性嘅監管要求,仲會直接通過行政化的監管方式進行管理。嚴格執行監管將使得銀行去槓桿嘅速度加快,未來會有更多銀行出於監管壓力收縮同業間的折借業務,而銀行投資的債券資產將同步收縮,帶來債券市場的拋壓,對於債券市場而言,監管利空可能才剛開始,「利空出盡」的壞消息仲未反映晒。而債券價格可能因拋壓而下跌,就令市場利息向上。客觀上有利讓內地物業市場降溫。

        如果企高小小嚟睇,銀行加強監管同保險業嘅整頓一齊嚟到,反映中央對嚴控金融風險嘅決心,和2015年股票牛市被狙擊致死有關。阿爺一直懷疑有人玩嘢隊低股市,台前玩家是內地股市大鱷,幕後是政治勢力,沽空獲利之餘,亦有意挫傷政府威信,如今是卻是阿爺全面整頓反擊的時候。

  呢場監管風暴,無可避免會影響到內銀股。過去幾年,內地增長放緩,內銀為了彌補貸款放緩同息差收差的影響,大力拓展理財產品,希望保住利潤,亦透過大量投資債券圖利。如今銀監會加強監管,好可能意味內地銀行要勒緊相關業務,並減少槓桿投資。呢個做法長遠有利銀行同宏觀經濟嘅健康發展,但短期無可避免會影響銀行嘅盈利,所以睇到前一晚美國個市無也大變動,昨日大陸股市行情都偏穩,上證指數仍升0.6%,但港股就係內銀急插下回吐0.7%。

滬指創今年高位成交增

  中資金融股昨日全面腳軟,跌幅普遍超過1%。工商銀行(1398)收報4.97元,跌1.4%、建設銀行(939)收報6.2元,挫1.1%、中行報3.69元,瀉1.1%。

  由於中資金融股都係大股,個市受佢地拖累開市無耐就插逾200點,下午內地股市反覆走好,雄安概念股繼續帶動A股大市表現,多隻股份升停板,滬指尾市倒升。另外,國務院總理李克強指中央政府今年要研究制定粵港澳大灣區發展規劃,相關股份亦造好,上證指數以近全日高位收市,收報3288點,升19點,升幅0.6%,是15個月以來最高;上海A股成交額仲創近4個半月新高,達到3263億元人民幣,較上日升近17%,港股跌幅稍為收窄。

  過去兩年內銀好辛苦咁撐住,盈利叫做大致持平,由於市盈率6倍都唔夠,估值好平,加上派到5厘以上高息,過去半年股份係低位慢慢回升,但如果銀監重手收緊風險管理,內銀盈利倒退嘅壓力就會加大,加上股價都有唔少反彈,未來表現可能會轉弱。

  政府晚上宣佈樓市加辣,一約多戶都要照交稅,呢招在預期之內,都唔算好辣,估計新盤會因此賣得慢啲。其實,樓價而家咁貴,若然再升就算政府唔加辣,大家都要諗吓買唔買啦!

陸羽仁

hd