金融High Tea——屠殺二線科網股

        美國總統特朗普「炒米」炒出火,搞到國會同意成立委員會調查選舉期間俄國有無干預,一場政治風暴可能爆發,搞到美股急插372點。特朗普新政由憧憬利好變成累街坊,港股反應雖然無美國咁激,但科網股就借住騰訊公佈好業績爆上,來個令股民措手不及的大屠殺。

瑞聲股價離地好難撐

  美股跌跌吓,港股反應初期唔大,騰訊公佈季績靚靚,一顯單天保至尊嘅氣勢,股價一度急升近10元,當時10大成交股份得佢一隻上升,但指數都頂住只跌幾十點。不過,臨中午收市,勢色開始唔對,上個星期俾人拋空嘅手機供應商瑞聲(2018)股價再插。

  淡友趁住騰訊業績強烈向二、三線科網股大開殺戒,來勢嚟得幾急吓,我覺得有咁情況係物先腐而後蟲生。物先腐唔係話下跌嘅科網股全部都有問題,但通病係升左唔少,變成股價偏高或者離地,至於搞到佢地碌低嘅蟲蟲就係沽空機構葛咸城研究(Gotham City Research)唱衰瑞聲就變左一隻病毒,佢搞到市場有啲人心不穩,結果一沽就散。

  葛咸城公開挑機瑞聲,雖然管理層火速拆彈,但陸羽仁當時已經預測佢輸面極大,原因好簡單,就係佢股價貴,而且累積升幅大,就算佢好人好者,佢都位高勢危,好易被人插低。正好早前所講,手機設備股唔同蘋果或者騰訊,本身有跨行業經營嘅機會,好似騰訊做完廣告可以做遊戲、做完遊戲做支付,盈利同潛力空間大啲,硬件生產離唔開接單生產,當市盈率升到好高,就有增長無以為繼的隱憂。當佢市值好大,俾人出嚟沽空唱衰,大股東要托都好難。

單靠騰訊市底虛虛地

  結果,瑞聲去到中途都頂唔順要停牌,停牌前報82.6元,下挫8.95元,跌幅9.8%,成交24.14億元。瑞聲盤中一度跌11.25%,見81.25元逾兩個月低位。成個科網股板塊係腥風血雨下,都搞到草木皆兵,好似今個月熱炒嘅IGG(799)由高位倒跌,最多跌至10.36元,跌幅近19%,收報11.08元,跌幅13%,仲驚嚇嘅係科通芯城(400),最多跌逾31%,低見7.32元,收報10元,跌幅6%。而公司就公佈,首季純利1.2億元人民幣,按年增長41.5%。按非公認會計原則計量股東應佔溢利約為1.34億元,按年增長33.6%。其他手機設備股普遍下跌,舜宇(2382)跌3.6%,報62.2元;通達(698)跌5%,報2.62元;丘鈦科技(1478)走低6%,報6.22元;信利(732)跌2.6%,報2.63元。

  昨日葛咸城發表針對瑞聲的沽空報告詳細版本,質疑瑞聲利潤率為何比起蘋果公司更高。報告質疑自2014年起,瑞聲有20間以上關連方未有公開披露,坦白講,呢個報告同最先的說法新意唔大,不過,有無新意唔緊要,緊要嘅係瑞聲嘅股價已經反彈左,係大家唔敢大手掃貨下,有人再沽佢就好易質低,結果瑞聲股價真係一插就大碌近一成,由於佢依家市值依然好大,估值仲係好高,沽空佢仲有肉食,所以狙擊好可能未停,其他科網股就要睇佢地本身係咪炒過龍,要各自修行嘞。

  科網股係五月嚟一舖崩盤屠殺,多少都反映市底唔係咁強,無論港美股市都係靠科網股帶動,佢地升升吓都已經有啲腳步浮浮,除左真係好硬功年嘅龍頭股,好多都已經偏貴。港股呢個星期都係靠頂住大股撐實指數,咁樣俾人一掃就好易仆低。係科網股被劏下,大市一度低見25025,最多跌268點,於尾市收復25100,報25136點,跌157點,國企指數收報10271,下滑111點,成交918億元。騰訊季績優於市場預期,股價再創新高見271.4元,收報264元,升1.62%。特朗普陷政治風波,市場憂慮其稅務改革及其他利好金融業措施未必能推出,部份國際金融股受壓,滙控(005) 借勢唞氣,跌0.77%,報67.4元,大市如果要頂住,睇嚟就要其他板塊生生性性至得。

陸羽仁

hd