金融High Tea——炒債券通爆出冷門

        港股下半年開波,首日市況較為平淡。債券通係國家主席習近平訪港後正式開通,港交所(388)受惠,股價應景造好啲,已經算係有交代。

  債券通先啟動北向通,由於本港債市唔係咁發達,南向通仲未有期。由於港人唔係咁習慣買債券,所以對消息嘅興奮度唔大。面對債券託管量高達65萬億元人民幣的內地債市,債券通開閘,中銀香港(2388)成為首家完成債券通交易的機構,滙豐銀行及渣打銀行(2888)等亦分別表示已進行首筆交易。中銀香港資產管理固定收益首席投資官阮卓斌表示,若日後中國納入兩大政府債指數,假設其佔比為5%,其需求將會較現時境外投資者投資2000億美元的金額以倍數增長。匯證認為,債券通安排讓外資購買在岸中國債券,提升運作效率下,有助中國債券納入新興市場債券指數,估計因而流入中國債券的資金介乎180億至200億美元。該行認為,債券通對港交所直接收入帶動有限,但凸顯港交所獨特地位。

熱門港交所先升後縮

  投資基金公會就估計,市場反應會較為慢熱。外界關注內地與海外國際信貸評級認可的差異,香港投資基金公會行政總裁黃王慈明希望,現有的合資評級公司,把海外評級標準帶入國內,但與國際接軌仍然需時。係債券通效應下,港交所股價最高上過去205.2元,收市升幅收窄,報202.8元,只係升左1元。做左首個交易嘅中銀香港最高見38.75元,收市同樣升幅縮左,報37.9元,升左0.55元。呢排中銀香港股價大強勢,到昨日先升後穩,反映回吐消化嘅壓力增加,唔排除短期要唞一唞氣。

  滙控(005)昨日就繼續造好,佢加埋平保合共為恒指貢獻54點升幅,滙控升1.24%報收73.55元;平保(2318)升2.33%報52.65元。恒指收報25784,升19點;國企指數收報10412,漲47點,成交金額751億元。

內房股借發債易撩高

  債券通開通嘅受惠者,諗唔到最大嘅竟然係內房股,都算係爆冷。市場炒作債市多左買貨渠道,有助於內房股發債紓緩財務壓力,帶動內房股普遍造好,特別係二線嘅公司。中國新城市(1321)大漲24%報1.77元;綠城中國(3900)漲15%報9.89元;建業地產(832)升12%報1.98元;中國奧園(3883)走高15%報收2.7元。大股升幅無咁多,恒大(3333)升9%收報15.3元,但其實升幅都已經好誇張;雅居樂(3383)升8.5%報7.76元;萬科(2202)升5.7%報23.35元。

  收市後中國恒大(3333)公佈,6月份合約銷售總金額611.2億元人民幣,按年上升95%,環比增60%。首六個月,物業累計合約銷售金額約2441億,按年增72%,完成4500億年度目標的54%。同時,截至6月底恒大已完成全部永續債的贖回。

  內房舊年發債借平錢確係好方便,今年債市無咁旺對佢地融資都有大影響,要考慮其他方法去搵錢,好彩係樓市去到貨。如果話債市得可以幫到吓,暫時似乎講得遠左啲。內房係下半年炒上,相信都係買佢地嘅投資者普遍贏過錢,升開阻力無咁大,特別係北水就鍾意就手,咁就炒完可以再炒囉。同樣情況一樣係銅鐵同金屬股出現,月前私有化被否決嘅興發鋁業(098)單日就急升34%報5.86元,比起建議嘅私有化價格3.7元高左一半;中國東方集團(581)升23%報3.57元;大股馬鋼(323)都升6%報3.31元;西王特鋼(1266)升8.11%報1.2元。

陸羽仁

hd