金融High Tea——手遊震盪 股王腳軟

        美股前晚創新高,但港股開市就唔多妥,指數腳仔軟軟向下跌跌吓,跟住仲愈跌愈急,股王騰訊(700)傳出王牌手遊出左事,股價受壓,連埋外圍科網股氣氛轉差,甚有福無重至、禍不單行嘅味道。

納指恐慌指數負能量勁

  美股前晚創新高,但納斯達克指數繼續差勁,納指收跌30.36點,跌幅0.49%,報6110.06點,facebook收跌1.69%,谷歌母公司Alphabet收跌1.1%,亞馬遜收跌1.48%,蘋果收跌0.36%,搞到納斯達克的恐慌指數升至18.74,創下14年新高,喺市場放出幾高嘅負能量。

  外圍科技股唔得,騰訊本來都有啲壓力,咁啱佢嘅王牌手遊又被內地官媒話會釋放負能量,對青年人有唔好嘅影響。騰訊嘅《王者榮耀》被指令青年人過份沉迷,人民網發表評論文章,話作為遊戲這是成功的,但面向社會它卻不斷在釋放負能量。呢個遊戲累計註冊用戶超過兩億,日活躍用戶超8000萬,每七個中國人就有一人在玩,其中「00後」用戶佔比超過20%。在此可觀的用戶基礎上,悲劇不斷上演。多數遊戲是無罪的,依託市場盈利也無可厚非,但不設限並產生了極端後果,就不能聽之任之。

  騰訊可能之前已經收到風,有咗準備,所以為左保障未成年人健康成長,經過將近一個月的調試和內測,公司會於7月4日以《王者榮耀》為試點,率先推出健康遊戲防沉迷系統的「三板斧」,仲強調呢個健康遊戲防沉迷系統是「中國遊戲行業有史以來最嚴格的防沉迷措施」。整個系統基於遊戲累計時長或單次時長對玩家進行相應提醒、下線等操作,通過限制未成年人每天登陸時長、升級成長守護平台、強化實名認證體系,實現防止沉迷遊戲的目的。《王者榮耀》遊戲製作人李旻亦急急透過微信表態,表明騰訊集中整個公司力量,建設整個保護未成年人系統。他指出,未成年人成長守護平台經過多次驗證和評估,認為直接綁定硬件設備,是較好的解決方法,這功能將快推出。

高升板塊回吐功力明顯

  騰訊回落,對港股氣氛影響明顯。睇真啲,陸羽仁覺得美國科網股嘅狀況仲令人擔心啲,因為佢地喺高位拉極唔上,有啲雪擁藍關馬不前嘅感覺,亞馬遜幾隻巨型科網股雖然係行業有壟斷優勢,但佢地嘅估值已經好高,如果唔能夠繼續畀到市場憧憬同幻想空間,咁地心吸力對佢地股價嘅威脅就會增加。對想趁低吸納科網股嘅投資者嚟講,可能都係畀啲耐性,睇吓有無機會等佢地跌深啲先出手會穩陣啲。

  股王出事,大市成日氣氛都差,恒指收報25389,急挫395點;國企指數收報10305,下滑106點,成交飆上989億元。騰訊控股(700)急挫4.1%,收報269.2元,跌11.6元,個別科技股隨之受壓,中國智能(395)跌9%,報0.103元;博雅(434)跌3.8%,報3.32元;IGG(799)跌2.97%,報11.78元。收市後路透報道,騰訊旗下嘅網上出版機構「閱文集團」已在本港遞交首次公開招股申請,料集資最多八億美元,以擴大手機閱讀業務及進行潛在收購。另外,上半年勁升嘅吉利汽車(175)急插3.4%,收報16.92元,反映個市高位有啲勢危,恒指係兩萬六千點樓上見咗高位,最近呢半個月都係升上無力,回調大力,所以除咗個別板塊嘅因素,都要留意個市係咪短期見咗頂,要有深啲嘅調整出現。

  除左手機相關股,濠賭股都跌得幾甘,起因相信係澳門金管局宣佈,即日起內地銀聯卡持卡人只能在貼有「KYC(認識你的客戶)ATM」標識的自動櫃員機提款機,局方將爭取今年內完成在澳門各區安裝「KYC ATM」,包括娛樂場內,以及周邊地區在內的自動櫃員機,並將密切跟進客戶使用情況,確保取款服務順暢。濠賭股係第三季首日已跑輸大市,昨日持續受壓。

  雖然科技股同濠賭股回落,都有個別原因,但我覺得都係因為今年呢幾類股份升得多,估值相對偏高,個市要調整,佢地就自然跌得甘啲。

陸羽仁

hd