金融High Tea——「大刁」搞旺場

        港股七月份終於有番啲生氣,恒指連升兩日,雖然未衝番過兩萬六千點嘅阻力,但大市連續兩日急升,加上中資金融股發力,有啲新板塊加入做火車頭,令市況多咗動力。

  恒指昨日升近四百點,指數未上破之前高位,不過同恒指掛鈎嘅盈富基金(2800)就創咗一年新高,收報26.55元,升0.4元,反映市場情況變番樂觀啲。最近市場有幾單大刁出現,令人相信傳統資產有價,對市場氣氛有唔少幫助。

  呢幾單大刁包括咗中遠集團(1919)以高價收購東方海外(316),同埋融創中國(1918)收購萬達多家酒店及文旅項目,其中包括北京萬達嘉華及武漢萬達瑞華等76家酒店,作價近336億元,而萬達南昌及合肥等13個文旅項目91%股權,作價則逾295億元。融創復牌後股價急升。

信店揸大酒店水漲船高

  融創中國通告披露收購細節,話總作價632億分四筆付清,最後的付款方式,是由萬達通過指定銀行向融創發放296億元三年期貸款,隨後融創向萬達支付295.75億最後一筆收購款,換言之,萬達借錢給融創收購自己的資產。

  融創老闆孫宏斌係內地民企話事人中以進取見稱,早前他做房地產以出價進取見稱,曾經因此吃過虧。近年佢轉而搞企業融資,有併購狂人之稱,先後買入不少房地產公司股份。

  至於今次賣嘢畀佢嘅萬達老闆王健林,係內地首富級人馬,年前佢有啲睇淡大陸房地產,特別係商業項目,提出要走輕資產方向,大力向影視娛樂進軍,今次佢就將大批物業資產賣咗畀併購狂人,雖然外界有人唔睇好交易,又話萬達借錢畀人買自己資產,又認為融創借咁多錢對財政狀況做成壓力,但融創股價卻不跌反升,塞住批評者把口。

  內地經濟近年急促發展,令大批富豪湧現,佢哋同香港嘅舊發財唔同,內地富豪作風進取,大開大闔,皆因內地市場而家仲係高速發展,穩紥穩打得慢就會執輸,所以好似融創呢啲交易,最後有無着數都好,但短期就刺激咗市場氣氛,搞到的資產股有價。

  傳統資產值錢,好多舊發財都放售外下嘅物業,初步估計而家係市場善價而沽嘅物業有1000億元,只要有部份成事,都會係市場釋放大筆資金,所以資產股呢排都有得炒吓,好似有幾間酒店權益嘅信和酒店(1221)股價就急升咗13%,報3.5元。信店早前增持同行大酒店(0045)嘅股權到5%,呢批股份已經值10億元。大酒店呢排有人係市場收集,股價由9元一直飊上14.5元,話咁快就升咗5成,而家成間信店都係值37億元,自然容易都水漲船高。

  大刁效應下,恒指造好,多番升逾400點,收市略為回軟報25877,都升咗377點;國企指數收報10416,上漲201點,成交880億元。藍籌騰訊控股(700)漲2.5%,建行(939)急升4%,收報6.18元;工行(1398)升3%,收報5.02元;中行(3988)都漲2%,收報3.66元;吉利汽車(175)急升7.5%,收報18.54元。椰子股首掛急升倍半

  早前細價股跌到一仆一碌,但唔影響個別新股掛牌,馬來西亞椰漿粉製造商椰豐集團(1695)首掛,一開就報0.7元,全日報收1.24元,較發售價0.48元,勁升咗1.58倍,成交2.77億股,涉資2.17億元。呢隻椰子股嘅主席Tang Koon Fook係上市儀式話,目前海外銷售佔集團整體銷售77%,未來將進一步拓展海外市場,如美國及中國市場。佢仲話好滿意是次來港上市的表現,認為香港是成熟市場,對香港有信心,相信本地投資者能對公司價值有良好認知。唔知係咪椰奶適合炒嘢,隻股升得咁勁,老闆梗係話好滿意啦。

陸羽仁

hd