金融High Tea——耶倫幫地產商賣樓

        美國聯邦儲備局主席耶倫走出嚟放鴿,令美股爆上新高,港股受惠擺脫之前嘅調整氣氛,出現四連升。耶倫出席國會聽證會講貨幣政策,爆響口話覺得而家離開「中性利率」(neutral rate of interest)並非太遠,又話加息和縮減資產負債表的行動將會緩慢地(gradually)進行。外界理解儲局加到中性利率就應該唔使再調高利率,所以認為耶倫對加息的態度比預期「鴿派」得多,甚至預期聯儲局9月不會加息。

賣樓股借勢炒番轉

  美股全面造好,杜指上日升123點至21532點,升幅0.6%,標普500指數11個板塊全部向上,對息口敏感嘅地產股板塊升咗1.3%。

  同一時間,內地公佈6月以美元計的出口及進口均達到雙位數增幅,雙雙創三個月新高,超出市場預期,出口更連續四個月錄得增長。當中出口按年升11.3%,進口亦升17.2%,升幅分別高於5月的8.3%及14.5%。上月貿易順差427.7億美元,按月擴大5.6%,同樣多於預期,消息都利好咗港股。

  美息鴿氣浮現,令本來落後嘅地產股都炒起。新盤停咗個零月唞氣,呢排再推出本來氣氛慢咗,雖然話登記仲係好多,但發展商都唔敢點加價,好多分析家都預計下半年會調整。

  實情現在公眾對分析家嘅睇法都係當吹水居多,皆因樓價升成咁,事前根本無人估到,就算大發展商都跌眼鏡啦,如果唔係點解個個係早幾年都無乜點買地呢?所以而家大家斷估無痛苦,總之見一步行一步。

  樓市有好多新盤要消化,咁啱耶倫出嚟幫吓手,係咁環境下,地產股見話9月可能唔加息,於是又炒一浸上去,暫時升幅比較顯著嘅係賣樓股,好似恒基(012)10送1後除淨,唞咗一輪後升番0.75元,報收44.5元;新地(016)升2.5元,收118.7元;長地(1113)升0.6元,報61.95元;新世界更升0.33元,收10.3元,幅度超過3%,係大型地產股升得較多者。新世界去年買起咗新世界中國,而家啱啱又私有化新世界百貨,執埋好多平嘢,論資產佢真係好豐厚,關鍵係幾時整啲好嘢益股東呢?

  港股向好,成交都有增加,恒指收報26346,升302點,正式上破高位;國企指數跑贏大市,收報10677,上160點,成交增至963億元,港交所(388)呢個時間開始發力,單日急升3%,收報208.8元。

H股跑贏大市

  中資金融股繼續領漲,中國平安(2318)上揚2.5%,報56.2元;工行(1398)升1.35%,收報5.26元;建行(939)升0.8%,收報6.39元,係國企指數向好下,恒生H股(2828)上漲1.6%,收報109.6元。

陸羽仁

hd