金融High Tea——平保爆上多聯想

        上周五美股再創新高,港股高開後內地增長數字靚仔,指數再上,但下晝升幅收窄,主要係內地股市乏力。

  全球股市呈現牛氣,點解內地A股會無力呢?主要相信同陸羽仁提過,內地剛剛話成立超級監管機構,限制資金亂炒,以及加強控制槓桿影響。

金融嚴控 A股腳軟

  滬深兩市低開,短暫衝高後掉頭暴跌,主要係市場開始聞到剛剛開完全國金融工作會議嘅結果,短期會對資金有壓抑作用,滬指盤中一度下跌逾2%,創業板暴跌超過5%。上證指數收報3176點,跌45點或1.4%。深證成指收報10055點,跌371點或3.6%。創業板指收報1656點,更跌逾5%。北京領導人係全球股市向好下拋出控制風險方案,短期難免掃興。而家內地股市有啲敏感,所以唔排除短期大陸股市會波動,會影響吓港股嘅氣氛。

  內地對金融市場防險意識提高,一來係十九大即將召開,可能唔想出現乜嘢亂子;同一時間都擔心係資產膨脹背後嘅風險增加緊。新華社昨日就發表文章,指當前世界經濟持續復甦,但國際金融領域出現一些新風險不容輕視,呼籲警惕全球金融五大風險,當中包括美國聯儲局加息與縮減資產負債表、全球貨幣政策轉向及全球債務風險。

  文章仲特別點出,美國要「縮表」,關鍵在於避免長期利率水平失控,如果長期利率大幅跳升,便會傷害美國經濟復甦,其外溢影響亦可能導致全球金融市場動盪,並誘發風險和危機。從官媒態度睇嚟,內地唔想見到自己嘅投資市場好似外面咁亢奮,避免外圍出事時被波及。

  係A股急挫下,港股雖然連升六日,但下午氣氛都有啲受影響,恒指高開後一度升229點,高見26618,其後內地A股下跌拖累,港股曾短暫倒跌,最多跌35點,收市前全靠內險股造好下重拾升勢,恒指收報26470,升81點;國企指數收報10783,上漲55點,成交金額932億元。藍籌股平保及國壽為升市火車頭,其中獲多間大行唱好的平保升2.27%,報58.5元;國壽升3.2%,報25.8元,兩股合共推升恒指40點。兩個火車頭帶下,內險股普遍造好,新華保險(1336) 升8.4%,報47.15元;中國太平(966)升3.7%,報22.4元;中國再保險(1508) 升3.3%。

內房繼續有派彩

  平保呢排股價好強勢,除咗憧憬內險受惠於國策,由平保創辦人馬明哲搞嘅眾安保險傳出來港上市好市近,都惹起憧憬。

  馬明哲與馬雲、馬化騰合組三馬成立眾安保險,講緊爭取第三季上市,屆時可能估計近千億元。呢間以網上銷售保險作主業嘅公司,被視為有金融科技嘅概念,係港交所今年寄望的大型集資之一。

  另下,平保近日都消息多多,佢本身旗下陸金所的國際業務平台,已獲新加坡金融管理局原則性批出「資本市場服務牌照」,可於今季在新加坡上線,外界亦經常猜測陸金所的上市時間表。早前佢哋嘅首席運營官兼首席信息執行官陳心穎就自稱,公司都係一間科技公司,未來將持續發展金融及健康醫療板塊的科技業務,仍有大量發展空間,搞到外界好多聯想。

  美國息口展望緩和,地產同內房股表現都唔錯,恒地(012)突然發威升咗1.45元,收46.1元,內房股仲多派多,華僑城(3366)升9.4%,報3.5元;裕田中國(313)升7%,報0.09元;中國金茂(817)升6.8%,報3.46元;佳兆業(1638)升6.6%,報3.25元;華潤置地(1109)升5%。

陸羽仁

hd