金融High Tea——鱷魚流淚你跟唔跟

        港股喺兩萬八點高位徘徊,美國上周五公佈重要嘅八月非農業就業數據,新增職位15.6萬個,遠低過市場預期嘅18萬個,顯示美國就業市場仍然比較疲軟。不過美國就業差,唔等於對港股壞,因為意味住美國加息機會下降,美元下跌,人仔企硬。

  現時環球投資市場嘅炒局,最根本原因係幾大央行不斷放水,但放水效果主要反映喺投資市場上,實體經濟雖然有好轉跡象,但仍然陰晴未定,最突出嘅現象係環球通脹率未全面回升,本質上係本來有環球通縮,但央行大幅放水,將經濟撐住。

非農唔掂 對港唔差

  但放水放咁多,通脹仍然冇大升,顯示經濟底子仍然較差。用美國術語,就係「錢全部去晒華爾街,但就冇走到大街(實體經濟)。」如果呢種狀況持續,意味着環球央行唔會咁快收水,炒局仍然會繼續跳舞。當然愈炒得高,風險就會愈高。

  人人都話騰訊(700)今年炒得好勁,升咗很多。但論炒得勁,融創(1918)炒得仲勁,過去一年升咗3.6倍,由低位5.1元,升到依家嘅22.8元。股票升咁多,大股東應該好開心至係。不過融創主席孫宏斌上星期五喺業績會上灑淚,呢個併購狂人俾台下質問時流淚,都可以算係流下鱷魚淚。

  孫宏斌今年有兩大動作,其中之一係斥資150億人民幣入主賈躍亭嘅樂視;另外就係用438.4億元人民幣從萬達買入13個文化旅遊項目嘅91%股權。他買萬達嘅文旅項目質疑聲音較少,但買樂視批評聲音就好大,認為樂視已經爆煲,孫宏斌插手收購,最後都阻唔到樂視嘅敗局,怕融創最後要輸大錢收場。

投資樂視 撥備11億

  融創今年上半年已為投資樂視,撥備11億元人民幣。喺上周五業績會上,孫宏斌原本想避談樂視,但俾台下多番提問,佢先作出回應。孫宏斌話樂視賈躍亭的確失敗咗,失敗喺唔夠堅決,唔識破釜沉舟、壯士斷臂。佢建議過賈躍亭「該賣嘅就應該賣,但係賈一條羽毛都唔捨得,好似老王(王健林)賣資產就好。融創打救樂視係出於善意,唔注資樂視,樂視就會死。融創對樂視嘅帳目睇得很清楚,投資以來,一步都冇走錯,相信樂視同內容團隊十分強,唔使改變佢嘅商業模式,就可以賺錢。」孫宏斌愈講愈激動,又話:「喺投資樂視之前,我呢一世已經冇乜遺憾,但喺投資樂視之後,如果唔將呢個公司搞好,我就真係有遺憾。」講完之後,他就哽咽,用紙巾抹淚。

  當然,好似孫宏斌呢種奇人,我們唔好將佢嘅眼淚睇得太認真。佢出身於聯想,25歲清華碩士畢業之後加入聯想。兩年之後畀聯想以挪用公款13萬嘅罪名告官,坐咗五年監。出獄之後再向聯想創辦人柳傳志借錢,創辦佢嘅地產業務。

  十六年之後即係2010年,佢嘅融創中國喺香港上市。一年前,內地地產市場比較低迷,融創市值只有261億元,隨著內地地產市場炒得火熱,加上孫宏斌接連出手,到處併購,股份炒咗上嚟,目前市值942億元。

未來目標 降負債率

  融創買咗13個萬達項目之後,負債急升,六月底淨負債率高達260%,孫宏斌當然知道市場嘅壓力喺邊。融創未來目標係降低負債率,透過賣樓回籠資金,減少淨資產負債率。目標係明年將淨負債率降至90%以內,後年嘅淨負債率唔超過70%。

  由於融創收購了萬達13個文旅項目之後,土儲面積達到兩億平方米。孫宏斌話考慮到有較高嘅土儲,一年之內將唔投地。融創成個故事,就是靠併購壯大嘅故事。而併購帶來嘅風險,就係高負債率。佢可唔可以成功降低負債率,安全著陸,就係中長線成敗嘅關鍵。

  融創未來面對嘅風險,可以從購入兩大資產嘅沽家點解要買產講起。萬達將438億元資產賣畀融創,萬達董事長王健林當然會肉痛,因為一年前佢仲豪言佢搞嘅文化旅遊項目,要將迪士尼趕出中國,結果就倉皇辭廟,要將文化旅遊項目沽出。

海外收購 易招追殺

  萬達之所以出事,主要係萬達老闆近年高調去海外收購,例如喺倫敦搶買物業,令人側目。大家都可以想像得到,過去一年,人民幣匯價仲喺一個下跌嘅狀況,阿爺嚴控資金外流,見到呢啲大財團喺海外大舉收購。  今年六月,中國銀監會聲稱會調查銀行對萬達等企業嘅大規模海外併購,會唔會影響國內銀行嘅資產負債表。市場焦點就落喺萬達身上,後來萬達債券價格大跌,演出咗一場風波。喺呢個背景下,王建林要急速賣產,唔係話萬達資產唔好,而係預計銀行將會落雨收柴,如果唔沽出資產,套回現金,好可能面對資金鏈斷裂嘅風險,賣產可以話係王健林壯士斷臂嘅行為。

  融創由於冇積極喺海外買嘢,冇畀管理層大光燈照住嘅壓力,融創收購萬達嘅文旅項目,的確可以大幅擴大融創嘅土地儲備,唯一問題係借貸過高。阿爺正要金融業去槓桿,唔想出現太多高槓桿嘅野蠻式收購,融創就要同時間比賽,究竟賣樓夠唔夠快套回現金,以應付銀行出年可能推行更嚴謹嘅貸款要求。所以,高負債並唔係冇風險。

樂視盤棋 一個難局

  融創更大嘅風險係用180億入股樂視,按孫宏斌嘅講法,佢同賈躍亭唔同,唔會唔捨得,會壯士斷臂。可以估計佢入股樂視之後,會將所有唔賺錢嘅業務快速割離。買樂視,當然唔係純粹救朋友,而係認為用180億可以控制一個電視業集團,相當吸引。

  不過,據內地電視業人士話,賈躍亭嘅問題固然係太心雄乜都搞,由電視業到投資美國開廠生產電動車。就算孫宏斌將樂視戰線縮短,集中做電視業,但問題係賈躍亭過去做電視嘅手法,都係一種非常之野蠻嘅成長方式,一開始就開大水喉,用補貼方式低價賣智能電視同電話,以大舉燒錢嘅方式搶佔市場。

  呢種營運模式,順勢燒錢容易,但逆勢控制開支困難。因為整個生意都係用錢燒出嚟,一旦收水,生意就會急速萎縮。樂視能唔能夠以控制開支嘅方式經營,相當令人懷疑。特別係國內互聯網電視業,競爭極其激烈。過去樂視谷錢燃燒市場,樂視依家不谷,其他人仍然會谷。所以大家對孫宏斌今年兩大併購之中,對樂視收購抱有好大懷疑。

  樂視可以話係一個巨大黑洞,不能夠純粹話投資180億元,撇帳11億元呢個小數目就可以完事。而係入完股之後,要承擔整個生意嘅債務風險。如果重組唔夠快,核心業務唔能夠快速扭虧為盈,成件事就好似一個巨大黑洞,不斷吸吮融創嘅資源。

  喺內地做房地產係一個簡單模式,穩健一啲好似中國海外(688)唔係以賣樓多取勝,而係靠利潤率比較高嘅方式發展。進取一啲如恒大(3333),以薄利甚至微利多銷,追求規模,有咗規模之後再慢慢調整結構。內地依家由於樓市總體趨勢仍然良好,做開發商比較容易賺錢。

  不過,內房商都睇到內地樓市好景唔能夠長期持續,高速增長時代將會過去。內房商都尋求轉型,但轉營到電視業,遠離咗本身嘅行業,孫宏斌可唔可以成功,外界拭目以待。但佢肯定係一條大鱷,融創股價已經高升,仲有冇咁多人同孫宏斌玩呢個遊戲,實在令人有啲懷疑。

陸羽仁

hd