金融High Tea——銀娛派錢息爭有啟示

  今年颱風似乎特別多,「天鴿」訪港以來,先後已掛起三個風球,據聞而家又有颱風在醞釀。最近中環茶友剛去過澳門,話當地俾天鴿打到七○八落,而家仲未完全復元。

  茶友係澳門回港,佢話天鴿呢次打到正澳門,停水停電,連博彩公司都中咗招,銀娛(027)係十號波期間要用自己嘅發電機頂檔,風暴完咗諗住快啲清理有危險性嘅垃圾,點知就俾人跳出嚟話佢只顧賺錢。

  呢排澳門就快選舉,政治環境敏感,一有風吹草動就好多人出來為民請命。銀娛樹大招風,好自然令人懷疑係咪有人搞嘢;不過,銀娛主席呂志和不愧跑慣江湖,二話不說就掟錢息爭,公佈話會提早發花紅。

花旗看好下半年賭收

  銀娛呢次發花紅,主要係幾年前公司因為人手緊張,推咗個挽留人才計劃,本來呢筆花紅年底先發,而家就提前將第一期花紅發俾員工。另外,由於上半年生意好,公司仲好有機會再發賞勵性嘅花紅。茶友睇佢掟錢息爭得到啲啟示,天鴿打殘澳門,一度停收旅客,但從管理層嘅反應,似乎佢哋對下半年嘅生意都幾有信心,既然有生意做,自然係和氣生財,快快手派吓錢搞掂佢。呢個世界有錢易辦事,聽講員工同管理層傾完,條氣已經順番好多。

  澳門博彩業去年觸底後開始回升,銀河娛樂上半年賺咗46.3億元,按年升81%;每股基本盈利108.3仙;不派中期息;但於10月27日派發特別息每股0.33元,公佈後股價創出一年高價,昨日就消化升幅,收報50.95元,跌1.5%。

  花旗啱啱發表咗報告指,澳門8月份賭收227億澳門元,同比升20%,雖受颱風吹襲影響,但表現勝於該行預測的220億澳門元,為反映最情勢。花旗上調2017年全年澳門賭收增長預測,由原來的16%,升至18%,單以2017年第二季澳門賭場EBITDA表現看,EBITDA按季跌4%,當中表現最好仍為銀娛(027),按季升4%,其次永利澳門(1128),按季升1%。重新分類中場賭收季內同比升66%,顯示此分類澳門賭業中增長最快一塊,相對貴賓廳同比升幅31%,中場增長好快。茶友睇完報告,話有人眼紅銀河都唔奇喎。

  好似銀河呢類熱股唞吓氣,雖然北韓局勢略為緩和,惟港股暫未見起色,周二走勢明顯缺乏方向,高低波幅不足200點。恒指收報27741,微升1點,終止3連跌走勢,成交額770億元,是7月初以來最低。藍籌中,九倉(004)落實分拆九倉置業上市,獲大行唱好,股價大升3.6%收報76.65元,為升幅最大藍籌;同系會德豐(020)升1%收報57.9元;有線寬(1097)更大升13%收報0.31元。

細價股個別熱炒

  多隻內房股陸續公佈上月銷售數據,刺激股價走勢凌厲,萬科(2202)首8月累計銷售金額較去年同期增長47%,股價創上市新高,收市升3%報23.75元;融創中國(1918)收升8%報25.3元;旭輝(884)升8.5%收報4.61元。碧桂園(2007)升3.5%收報11.2元;中駿置業(1966)則收升7.3%報4.11元。

  沉寂一時的細價股再有炒作,聯交所於7月底對中國生物資源(8129)展開除牌程序,股價之後於低位窄幅上落,惟周二突然熱炒,股價曾爆升逾1倍,高見0.06元,收市前升幅略為收窄,收升52%報0.044元。至於中國農產品(149)公佈,建議股本重組及供股不獲聯交所批准,該股周二復牌,股價照升,最高見0.168元,曾漲逾41%,收升23.5%報0.147元。其他細價股同樣熱炒,中國錢包(802)升近40%收報0.295元;吉輝控股(8027)則升36%收報0.08元。

陸羽仁

hd