金融High Tea——人仔漸鬆綁

        內地企業改革持續,兩大建材公司正式宣佈合併詳情。中材(1893)以每1股換取0.85股中國建材(3323)股份比例,併入中建材旗下。消息公佈後,俾人買起嘅中材股價向好,彈升咗12%收市,報4.03元。內地企業進一步改革,概念上可以提供盈利,成為中資股嘅強心針。

中材業績靚仔被買起

  按公佈嘅合併條件,以中建材及中材停牌前報5.02元及3.58元計,等於中建材以溢價19%吸收中材,合併要取得出席股東大會相關股東所持表決權三分二以上投票通過。中建材總裁曹江林喺記者會解釋今次出價,係財務部按兩公司過去股價表現、行業表現、財務狀況、政府溝通同公司發展規劃計算,相信價格係最好。

  兩間公司喺11月通過股東會後,可以喺12月或1月完成合併,行軍認真迅速。合併後中建材嘅負債會由228%降低60%至168%,未來資本開支得以下降,令經營現金流可用於償還債務,同時規模效應亦可提升定價能力同降低借貸利率,負債比率可逐步下降。曹江預期,合併後每年公司嘅經營現金流為300億人民幣。佢仲話,未來會優化人才結構,部份多餘嘅勞力調任母公司新發展業務。

  睇番今次合併,俾人收購嘅中材股份(1893)今年半年業績股東應佔淨利潤5.96億元人民幣,按年增長94%,每股基本盈利16.7分,前景相當唔錯,呢個亦解釋咗點解佢小股東會獲得溢價收購,中建材就無。長遠嚟睇,今次交易對中建材其實相當有利,因為消除咗主要對手外,仲可以透過發股變相強化咗自己嘅財政狀況。

  內地加強大型企業整合,相信類似重組會陸續有來,所以今次交易結構都值得留意。另一個可以留意嘅行業係水泥業,內媒報道中國水泥協會常務副會長、行業去產能領導小組組長孔祥忠赴武漢華新水泥總部調研,交換行業去產能工作相關意見。雙方一致認為,水泥行業去產能工作刻不容緩,大集團要帶頭行動,共同推進去產能工作,相信水泥業都要郁手,由於水泥有地理供應因素,唔同地方嘅水泥廠可以並存,呢個係揀股要考慮嘅因素。

  內地企業加快整合,外資對內地投資前景都有啲轉向,從近幾年淡聲淡氣變得較為正面。花旗發表咗中資股策略報告,上調MSCI中國指數、滬深300指數同國企指數12個月目標。當中國企指數預測目標,由原先嘅11000點上調至13000點。

改變大行對中資股觀感

  花旗唱好嘅理由係,上半年MSCI中國指數成份股每股盈利按年上升22%,為亞洲新興市場中最高,而大部份行業板塊盈利好過市場預期,上市公司管理層整體上對今年下半年及明年展望正面,特別係互聯網、科技及房地產。該行估計,今年第四季度業績表現將會係全年最強,加上人民幣兌美元升值,令資金外流嘅情況逆轉,都係睇好嘅理由。

  外資態度改變,同人仔匯價好有關係。人仔經過一輪回升後,人民銀行噚日確認停止徵收外匯風險準備金,並取消對境外金融機構境內存放準備金嘅穿透式管理。人行金融研究所所長孫國峰解釋,今年以來人民幣兌美元匯率整體升值,兌一籃子貨幣基本穩定。喺市場環境已轉向中性嘅情況下,有必要調整前期出台嘅逆周期宏觀審慎措施,相應回歸中性。人行喺2015年9月開始徵收外匯風險準備金,規定代客遠期售匯嘅金融機構,應向人行繳納20%嘅美元準備金,作為自811匯改後,應對人民幣加快流出嘅措施,可見阿爺對走資危機嘅威脅感已大減。

  人仔鬆綁理論上對中資股係好消息,但市場反應暫時唔算好明顯,恒指昨日收報27955,升咗286點;國企指數收報11221,只係漲71點,成交894億元,市場唔係咁起哄,其實都唔係一件壞事。

陸羽仁

hd