金融High Tea——電能車有概念少靚股

        恒指28000關口唔易破,資金轉為炒吓概念。美股創咗歷史新高,但港股周一已經升咗,噚日高開後乏力,反而電動車概念就爆上。

  吹襲美國嘅颶風破壞力無預期咁勁,成為華爾街炒作藉口,美股破頂而上,杜指收報22057點;不過,美股22000同港股28000一樣,都係阻力唔細,雖然指數衝咗上嚟,但係咪企穩仲係未知。

  港股周初開市偷步炒高,噚日投資者都唔係咁勇,指數衝上28000後回番落嚟,恒指上落拉鋸一番後,收報27972點,升17點,始終過唔到關;國企指數收報11242,漲20點,成交奀奀地只有899億元。

比亞迪已算最扎實

  大市焦點落喺車股上,吉利汽車(175)急升逾6%,收報20.7元,為升幅最大藍籌股,市傳吉利母公司將生產高端電動車。升得更勁嘅係專做電動車嘅比亞迪(1211)急漲11%,收報54.6元,同時急升嘅仲有其他電能股,好似做汽車電池嘅超威動力(851)升咗16%,報收4.63元,五龍電動車(729)升咗6%,收報0.355元,天能動力(819)收7.33元,升咗4%。

  突然觸動市場炒作神經推高電能車概念股,原來係大陸官員啱啱喺天津舉行嘅「中國汽車產業發展國際論壇」上透露,將研擬禁售燃油車嘅時間表。國家發展改革委產業協調司處長吳衛透露,正喺組織起草國家智能汽車創新發展戰略,通過制訂戰略明確未來一個時期中國智能汽車發展嘅戰略方向。

  早前陸羽仁同政經猛人傾起,佢已留意到歐洲提出以電能車取代傳統汽車嘅計劃,好似德國已經表明要喺2030年前要禁用燃油車,法國同樣加快取締燃油車。因應歐洲嘅政策,大眾汽車首席執行官Matthias Mueller透露,汽車工業嘅轉型勢不可擋,大眾一定要成為當中嘅領導者,所以集團旗下全部300款車型將會喺2030年前推出電動版,為咗達到呢個目標,公司將斥資200億歐羅(240億美元)發展電動車,並承諾投入500億歐羅用於電池。

  歐洲去得咁勇,大陸喺新興產業嘅發展同競爭上,取態係一係唔做,一做就要做到最盡,喺推動電能車上相信都好有機會同歐洲汽車大國較勁,所以大行呢排紛紛發表報告,推介買入相關概念股,作為龍頭嘅比亞迪就第一個受惠炒起。好似大和就出咗個研究報告,認為中國官員所提出嘅新方向能顯示中國喺加長發展新能源汽車嘅目標及決心,但就指政策難以喺短期影響主要新能源汽車生產商盈利。長遠嚟睇,該行相信停產傳統能源汽車嘅計劃肯定能利好整個新能源汽車行業,尤其是如比亞迪等具市場領導地位嘅公司,重申維持對其「買入」,並續予目標價58元,不過呢個價已接近一步到位。

  電能車潮流講咗幾十年,呢次睇嚟最似樣,可惜呢個板塊好公司唔係咁多,好似做電池嘅好多都仲係處於半浮沉狀態,所以有概念難搵好股,比亞迪已算係當中最揀得落手嘅一隻。

  佢依家市盈率26倍,息率1.1厘,同其他類型股份比數字偏高,但喺電能車概念中已算扎實,不過佢急升一日幾乎已去到大行目標價,所以就算想買佢最好都係等等先。

紙業股炒年尾旺市

  除咗電能車股外,內地紙品價格持續堅挺,喺憧憬年尾消費旺季下,紙品股呢排都跑贏大市,龍頭玖紙(2689)急升7%,收15.76元;理文造紙(2314)升4.5%,收10.2元,晨鳴紙業(1812)升5%,收13.66元;細隻啲嘅陽光紙業(2002)仲升夠10%,收2.68元。

陸羽仁

hd