金融High Tea——科技股熱度高

        網上文學平台閱文(772)招股告一段落,結果凍資超過5200億元,幾乎肯定派唔到一人一手。佢超購反應咁熱烈,加埋外圍科網股升勢如虹,令本地科網股王騰訊(700)炒上,連同內險股造好,恒指喺11月首個交易日爆升348點。

閱文散戶隨時要10抽1

  閱文周一結束招股,吸引咗逾40萬人認購,公開發售超購620倍,凍資高達5200億元,成為歷嚟第二大「凍資王」,僅次於凍資逾5400億元嘅中鐵建(1186)。

  以初步公開發售股數1513.72萬股,每手200股,即係有7.56萬手股票可供認購。

  依家超購620倍,閱文招股書話,若果公開發售認購數目超出初步發售數目嘅50倍或以上,就會回撥國際配售比例,令公開發售股數增加到33%,即係4995.28萬股,或24.97萬手。

  以24.97萬手畀40萬個申請嘅股民平分計,即係每1.6個人爭一手股。現實係唔會均分,大飛點都會分多啲。

  如果以增撥後比例計,超購188倍,即係要認購188手先穩得1手,所以如果認一手,10個中一個已經算係唔錯。

  至於認購閱文嘅「頂頭槌飛」多達277張,每張頂頭槌飛為750萬股,即係3.75萬手,如果按超購188倍計,可以分200手,即係40000股,不過由於大飛分配比例低好多,相信分得嘅手數會少好多,至於有冇肉食,由於有借錢利息成本,就要睇埋掛牌後嘅升幅。

  喺閱文咁熱下,跟住上市嘅雷蛇(1337)反應都好熱烈。由於唔少人已經用咗重錘去抽閱文,相信雷蛇超購冇咁勁,好多銀行趁機出嚟再谷孖展生意,趁機賺番一筆。

ASM回購信心足

  閱文大熱,市場憧憬騰訊仲有好多業務可以分拆,令佢成為大市火車頭。恒指收報28594,急升348點;國企指數收報11636,上揚128點,成交去到1102億元。騰訊升近3%,收報360元。

  唔好忘記騰訊依家市值已經有34200億,單係噚日升幅已經有1000億元,超過咗成間閱文嘅身價。

  追捧科技股嘅熱風吹到晶片股,獲麥格理唱好嘅中芯(981)升8.5%,報收12.98元;華虹半導體(1347)升9%,收報14.84元;先進半導體(3355)升5.2%,收報1.22元;晶門科技(2878)升2.53%,報0.405元。

  科技股當炒,老牌科技股ASM太平洋(522)都出招,集團公佈第三季純利8.65億元,按年增長48.14%;首九個月純利23.58億元,按年增長1.19倍。與此同時,公司會喺出年股東大會前回購達7.8億元股份。

  佢又話,如果回購數目未能達到,將會考慮向股東派發特別息。公司宣佈回購,顯然係睇好前景,喺消息推動下,股價升咗2.8%,報收116.7元。

  除咗科技股,內險股季績強勁獲高盛唱好,一眾內險股齊急漲,國壽(2628)升7.4%,收報27.7元,成表現最佳藍籌股;財險(2328)、人保(1339)漲8.4%,中再保(1508)升4%,收報1.8元;平保(2318)升2.6%。

  三、四線方面,呢排比特幣造價炒上,做掘礦顯示卡嘅柏能(1263)股價大升12%,收報3.91元。

陸羽仁

hd