金融High Tea——上緊菜唔會咁快散席

  港股上日V彈後,開市科網股王騰訊(700)帶動下大升,頗有為閱文(772)上市造勢味道。

  美股高位徘徊,無乜睇頭,但港股自己有自己行。早前美股大力爆升,港股唔跟,同外圍屢創新高比較,恒指相對上落後,周一閃跌後大市V彈,即日完成震倉,睇個勢都係強。

  日本股市創出多年新高,港股都加入升市行列。恒指周二高開118點,報28715,其後愈升愈有,大市午後更衝破29000大關,最多升420點,高見29017,創近十年新高,尾市升幅稍為收窄,恒指收報28994,升397點;國企指數收報11645,漲120點,成交金額1151億元。

  中環茶友笑言,日前金管局公佈第三季外匯基金盈利破紀錄,行政總裁陳德霖出嚟解畫,提醒大家全球股市估值唔平,要留意美國加息縮表步伐比估計中快。

  不過,睇中央銀行家分析大家要有另類解釋,因為佢比較學苑派,而且著重防範風險,所以升市之時,佢點都唔會唱好,叫大家唔使驚,通常佢提出嘅憂慮至少快左三拍。陳總呢次出嚟示警,程度都係黃燈,聽完佢咁講反而唔使太擔心。

新股登場準備起鑊

  茶友唔多唔少都有講笑成份,中央銀行家講嘢,唔係針對短線炒賣,佢最注重系統性安全,點炒作捉大戶手影更加重要。依家閱文上市,跟住有雷蛇(1337),然後再有易鑫(2858),咁多大餐上緊菜,照計大戶點都炒埋呢幾轉至畀個市跌啦。

  閱文周三掛牌,騰訊勢如破竹,以全日高位收市,升3.71%見391元,創歷史新高,更為恒指貢獻122點升幅。

  閱文暗盤逼近80元,升幅超過五成。除左大熱科網股炒作外,恒大(3333)公佈第三輪融資,吸水600億元人民幣,借住呢個消息股價再度爆上。

  恒大今年大炒回A,股價由唔夠10元一路炒上,貨源歸邊已經好明顯,所以公司有好消息,股價反應特別強勁。噚日開市已經全力夾高,結果收市收升近9.4%,報收30.9元。

  恒大夾完又夾,其中一大動力係來自華置同甘比嘅增持,有人計過數,甘比個人連同集團截至噚日恒大嘅持股量計算,合共持有超過9億3000萬股恒大,相當於恒大已發行股本總數約7.1%,以噚日收市價計,甘比個人連同集團持有嘅恒大股票市值超過288.7億元。

  消息人士話恒大受到多間國際投行追捧,例如美銀美林調升恒大目標價至33元。佢覺得,呢次多家國際投行調升恒大目標價,主要係因為恒大噚日宣佈,間接附屬公司恒大地產,同六間戰略投資者簽訂增資協定,有助恒大顯著地降低負債比率,加上恒大擁有豐富土地儲備,預期可以有效提高未來核心利潤。

恒大再升甘比等靚位食胡

  再者,恒大10月實現銷售額人民幣563億,按年大增55.8%,累計實現銷售額人民幣4223.4億,按年增33.4%,已完成其本年度人民幣4500億目標超過九成。

  有報道花旗報告已預測恒大可能超額引資,並可進一步降低負債,集團管理層預期恒大將會喺11月向中證監遞交申請,2018年上半年可完成回歸A股計劃。

  華置同甘比依家揸重恒大,但消息人士重申,會因應整體市場環境、成本利潤、集團財務狀況而定,等恒大股價達至滿意同吸引水平,先會考慮變現部份恒大股份,屆時唔排除就有關變現收益,或出售所得部份款項派發股息俾股東。

陸羽仁

hd