金融High Tea——閱文唔易變騰訊第二

        外圍冇動靜,港股就聚焦咗喺新股閱文(772)首掛上板。佢未上市前,阿媽騰訊(700)已搶閘創新高,所以市場都對佢寄望甚殷,結果閱文都無失威,首掛升幅超過預期,最高曾爆升一倍見110元,收市報102.4元,較上市價55元,高出47.4元或86.18%。不計手續費及佣金,一手200股賺9480元。

  開市後,幾個中環茶友見佢升勢超乎預期,都打嚟問好無食胡沽貨。茶友中大部份人都有入紙申請,由於佢哋都係有銀之人,唔借孖展入飛數量有番咁上下,結果都係分得一兩手雞碎咁多。呢班茶友中,攞到一、兩手都唔當一回事,但見到佢咁升法,都忍唔住吹吓水,好唔好沽咗佢買個iPhone X。

首掛表現遠超專業估值

  對於大小股民,賺到錢食胡,陸羽仁基本態度係收割獲利幾時都無壞,特別係好似呢類賺錢咁快咁深嘅個案,股票好似公仔紙,落咗袋先係真錢。不過茶友們吹水嘅背後,係問緊閱文個局,大戶會唔會費事收貨,就咁再炒上去散水,若然係咁有可能你沽完佢再升,若然唔係股場老手,沽完再升未必咁開心。但陸羽仁仍然係嗰句,佢如果你想食胡,咁咪隨心所欲做囉。

  陸羽仁咁答有兩個原因,最大原因就是信專業。閱文上市有商人銀行提供意見,佢阿媽騰訊又係科網界龍頭,兩大行家訂出嚟嘅招股價55元,應該好專業,就算公司訂價唔想去得太盡博市場好感,照計都冇理由平咗一半推出市場啦,所以依家佢咁升法,從估值角度係咪有啲非理性亢奮呢?

  有茶友性格包拗頸,話咁又點知閱文唔係騰訊翻版呢?騰訊當年由美資大行安排上市,結果掛牌幾年後開始發力,升到唔停,證明大行都會睇錯啦。茶友呢個講法聽落好似有道理,但就抹殺咗騰訊上市幾年後,特別係2007年後移動互聯網嘅特殊性。

  騰訊上市初期升幅都唔係咁勁,但隨住公司愈做愈好,特別喺移動互聯網時代,微信喺內地有壟斷地位,盈利不斷增長,估值先可以調高再調高,呢個情況肯定連創辦人馬化騰都估唔到。生意係生,估值係死,騰訊上市時嘅估值,反映咗當時公司實際情況,所以股價係隨住市場情況同公司發展不停轉變,騰訊盤生意都通過咗無數咁多樽頸,先至去到今天,以公司計係千中無一。要注意嘅係,騰訊可以發展成移動互聯網年代跨行業龍頭,但閱文就無乜機會去到呢個地位,因為呢個位佢阿媽騰訊已經坐咗。

  從閱文定價已反映專業估值嘅角度講,閱文依家比招股價升咗85%,可以話已超越咗專業對佢中短線估計嘅價值,將來佢會唔會變成中國MARVEL冇人敢講死,但至少中、短期嚟講佢已經幾貴,依家沽出咗日後可能有機會平啲買番。

  至於第二個原因簡單啲,就係閱文之後,仲有其他科網股嚟緊。啱啱呢個星期招股嘅易鑫(2858),都一樣有騰訊概念,所以沽咗閱文,可以買吓易鑫。

  陸羽仁識嘅茶友覺得中一兩手閱文太少,本來已諗住短炒,所以沽貨者多,留貨者少,他們嘅心態係賣仔莫摸頭,再升都唔關自己事。而少數例外唔沽者是長揸派,乜股都長揸,閱文都唔例外。

  睇番個市其實都唔係一片好景,港股喺新股熱潮下要回落收市,恒指收報28907,跌咗86點;國企指數收報11576,跌69點,成交去到1388億元。累升唔少嘅騰訊倒跌1.4%,報385.6元。受惠新股上市嘅港交所(338)都跌0.61%,收報227元。

領匯預警低息有利環境過去

  領展(823)公佈第三季業績,中期分派按年升8.7%至1.215元。摩根士丹利唱好話符合預期,仲話領展續租租金調整率強勁令市場驚喜,預期策略性重整可支持佢估值,重申對領展「增持」評級同埋目標價68元。

  不過領展股價一度倒跌,收市就報66.4元,無升跌。領展股價下半年呆呆哋,我覺得同市場注意力去咗好似騰訊呢類概念股有關,自從美國縮表前後利息向上走,市場對收息股興趣下降,對領匯唔係咁著數,加上好似管理層都話,有利嘅低息環境正在消失,會繼續採取審慎資本管理方針,抵禦市場波動,咁大摩話有驚喜,又係咪有人聽佢支笛先?

陸羽仁

hd