金融High Tea——近年底科技股要捱

        呢排股民都係玩高位食胡,今次輪到今年累升唔少的科技股,跌市由上日美國市開始,反映科技股走向的納指大跌超過1.3%。美國五大科技巨頭,facebook、亞馬遜、Netflix、谷歌及蘋果齊齊下跌2.1%至5.5%不等,半導體股Nvidia跌近7%,Micron更跌近9%,標普半導體ETF插逾4%。

  跌市傳導到香港,上午急插,下午反彈乏力,恒指收報29177,插446點;國企指數收報11475,下滑172點,成交大升到1719億元。

  跌市焦點自然係科技股王騰訊(700),一舉跌穿咗400元關,急挫3.3%,以全日最低位398元收市,堪稱彈都唔彈;瑞聲科技(2018)急瀉6.2%,近排急漲的平保(2318)同樣急跌3.8%,收報77元。

  呢一波科技股跌浪,即有升得急跌得急的技術調整味道,亦有近年底的因素。科技股今年升幅驚人,依家單單係食胡沽盤,都仲有大把水位。以騰訊為例,由1月的低位179.6元起步,升到早前高位439.6元,尾段愈升愈急,首先升得多亦調整得多。

騰訊到50天線可博

  再加上時近年底,芬佬返多一兩個星期都放聖誕收爐,若揸了騰訊此等科技巨股,最緊要保住利潤,以免影響分紅,所以一定係定咗死位止賺,一穿就沽,加速了跌勢,所以12月係科技股的高危期。

  騰訊現價398元,距離高位10%的位置395.6元不遠,正常時候短炒騰訊跌10%可博,再加上已到20天線399元的水平,值博率上升。但加上上述芬佬年底止賺的因素,想短炒騰訊者都要睇低少少,佢50天線是374.5元,騰訊大升以來,今年只有7月跌穿過一次50天線,所以若想買騰訊,等佢落到374.5元時投機性買入,定一成止蝕即337.5元,若大跌穿位就打靶,以10%輸幅博20%升幅,都有一定值博率。

  另外本地銀行股算另類,但亦都係跟外圍美股走勢,滙控(005)頂住無升跌,收報78元,中銀香港(2388)更逆市升1.5%,收報39.5元。拆息近日走高,對資產股帶來壓力,但就令銀行股跑贏大市。高盛發表報告,認為若本港同業拆息趨升持續,料會推升銀行股股價,現高盛正觀察存款息率及最優惠利率變化,暫高盛預測2018年香港最優惠利率會因存款息率上升而轉嫁獲上調,報告確認中銀香港(2388)及滙控(005)的買入評級,12個月目標價45.6元及84元。

樓價升觸發恐慌指數向上

  股市去到最後一個月,提早收爐味開始出現。中環茶友圍坐,論題由股市轉到樓市,最新數字顯示,樓市升足十九個月,屢創新高,但點解地產股呢排反而無厘神氣呢?

  有茶友從正路分析,認為同呢排拆息扯高有關。拆息上令用浮息嘅供樓客要俾多咗錢,加上12月美國差唔多督定加息,對地產股不利。佢認為加息後若然利率前景展望唔係咁差的話,地產股有機會炒一轉落後。

  對於樓價升而地產股慢升以至唔升呢個現象,陸羽仁曾經問過基金經理,佢解釋好簡單,就係覺得樓價升得急,升到去好多人話負擔唔到的水平,令人擔心樓價無法支持。樓價升,地價跟升,地產商唔買地,土儲唔夠會影響估值,繼續買地風險增加又影響估值,所以一日唔離場,一日都要承受風險,正如地王面世,理論上應該令地產股淨值調升,但同時基金經理寧願任由地產股啲資產折讓加大唔去買,原因係擔心樓市風險上升,呢種情緒可以從國際貨幣基金組織(IMF)啱啱發表報告,話香港樓市存在系統性風險中反映出嚟。從地產股折讓增加,可以反映到大家對樓價的恐慌情緒上升,結果就令到地產股升幅會落後咗,直至市場慢慢接受新的樓價水平,先至炒番落後。

  聽完基金經理咁講,陸羽仁回應係樓價升、地產股價遲升或慢升,有啲似拉牛上樹,比較吃力。呢個同香港成個競爭力好有關係,因為依家香港基本上有少數幾個行業好景,主要係地產同金融,基他行業都受制於呢兩個大佬,當市區二百幾呎住宅賣到成千萬元,就連基金經理都擔心咁樣係咪竭澤而漁,喺咁情況下,雖然地產業好肥仔,但大家都驚驚哋呢個板塊唔係咁健康,所以唔敢俾咁高估值佢,所以從估值、市盈率以至派息,地產股都係大件夾抵食,不過佢就似慢牛上樹,郁得都幾吃力。

陸羽仁

hd