金融High Tea——買咗騰牛 血濺街頭

        美歐股市向好,但港股繼續獨憔悴,主要係北地冷風繼續吹,昨日輪到內地創業板滑落,芯片類股成為災區,影響埋港股氣氛。

  杜指上日借住減稅措施走過眾議院炒作,一度大幅飆升259點,但收市跌剩58點,雖然叫做升市,但大漲回調令人感覺有啲強弩之末,港股開市已經唔係點跟升,之後內地股市回調,港股隨即愈跌愈多。

證監關注高送轉拖低創板

  內地股市呢排輪流跌,早排係優質白馬股調整,昨日輪到創業板跌得急。上證指數收報3303點,跌咗5點;深證成指收報10854點,跌159點;最勁係創業板指收報1758點,跌39點,幅度接近2%,板塊中以集成電路、芯片、稀土在跌幅榜位居前列。

  上證指數反覆回探3300點水平之餘,本來唔強的創業板再插。呢排內地股市回落,但實質利淡因素唔係咁明顯。昨日回調理由有幾個,包括早前績優的白馬股回調,誘發咗部份資金換馬沽出概念股,令到創業板股票受壓。同時,早幾日證監話關注高送轉股票,引發炒家憂慮,都成為淡市成因。

  中國證監會早前話關注高送轉股票,何謂高送轉股呢?即係有啲公司好鍾意搞派送,但實際業績跟唔上。證監會懷疑呢啲公司利用印股票做禮物引投資入局,實際上係方便自己圈錢或者炒作圖利。證監會的表態就令到資金撤出中小公司同缺乏業績支持的創板公司。

  內地創業板積弱唔係今日的事。創指喺2016年見2208點高點,之後插到今年7月的1641點,呢兩個月曾經彈上1900點,跟住呢兩個月就反覆回落。年晚資金開始鎖緊利潤,加上部份基金經理預期明年內地都仲係會炒績優股做主導,令到創業板繼續受壓。

  內地早排開始沽出績優股同累積升幅大的股票,呢個現象已吹至香港,特別係手機設備股,科網股持續捱沽,仲有就係芯片股。9月份跟住內地炒起的中芯國際(981)飆上今年最高的14.76元後,呢個月好快咁急插,昨日一舉插逾6%,收報10.52元。芯片股本來炒作概念係內地每年買入逾2000億美元芯片,芯片公司有好大本土市場可以發掘,加上未來人工智能等芯片需求有增無減,一炒起上嚟令股民趨之若鶩。但現實上,內地芯片生產水平同國際強者比仍有距離,加上生產用的高科技設備受限制,所以芯片股有概念但未必能落實到,炒起上嚟就變成升得高,插得快。

炒牛熊證企錯邊好快玩完

  A股拖住港股,恒指收市跌穿29000關,收報28842,急挫295點;國企指數收報11484,下跌33點,成交1019億元。騰訊(700)再挫3.2%,收報376元;平保(2318)先升後跌1.3%,收報76.2元;舜宇光學(2382)急挫5.7%,收報124.5元;瑞聲科技(2018)下滑2.2%。

  呢啲熱炒股價跌造成另一個災區,就係科網同手機設備股嘅衍生工具。呢排騰訊、瑞聲等小漲大回,買正股已經唔易頂,炒窩輪同牛證就仲易出局,好似昨日最大跌幅的窩輪同牛證,基本上都係騰訊、平保同舜宇光學的衍生工具,呢啲產品普遍回落兩三成,牛證波幅超大,跌五六成者比比皆是,一插就插死好多牛友,單以騰訊牛證成交最多的高盛八二牛I(60846),昨日跌咗61%,成交有8200萬元,帳面損失已接近5000萬元。

  另一隻跌幅最勁的法興八六牛M(69139),跌幅高達91%,而且有6100萬成交,都算係血流成河。好似騰訊呢啲大股,好多股民唔會買正股,改為玩衍生工具。買牛熊證最忌企錯邊,如果貪刺激去玩,升時買中固然賺到笑,睇錯市就好快血濺街頭。

陸羽仁

hd