金融High Tea——聯控股東等拆禮物

        美股隔晚稍升,內地A股低開後回彈,港股好友似乎想爭取喺30000點做年結。假後復市造好的個股繼續熱鬧,內房股碧桂園(2007)繼續向好,大升7.9%。

碧桂園股價再升

  碧桂園股價造好,多少反映佢今年繼續進取策略,在賣樓指向5000億元之際,買地數量繼續係三甲份子,同時集團為了食住一帶一路發展,係大馬新山力谷當地新區項目森林城市。呢個項目位於新加坡旁邊,集團堆沙造島,準備打造一個百萬人居住的新城,充份反映集團主席楊國強的進取作風。有熟悉集團人士話,呢個係楊國強都好睇重的項目,不時會御駕親征視察項目。

  過完聖誕節,就係拆禮物日。有中環茶友笑言,近日大市喺30000點關徘徊,個別股份就爆上,好似上市後無乜好過的聯想控股(3396),就變成「拆禮物股」,在假後大力爆上,一洗掛牌以來的頹氣,昨日開市又再爆上,高見35.9元的一年高位,收35.6元,再升2.9%。

  聯想控股呢次彈升,主要係有北大關連的國企紫光控股(365)入股,並且持續增持,隨著增持消息陸續出籠,兩隻股價節節彈升,紫光昨日再大升63.9%,充份體現買人哋股炒高自己嘅美妙操作。

  對於今次行動,紫光說法入股主要是財務考慮,暗示聯想控股係抵買股份,入市掃貨並非係有併購的想法。

  由於紫光主要從事科技投資,與聯想的性質有點相近,可能因此對聯想了解多啲,以至比一般人更加欣賞,所以一直入貨。市場對於紫光的動作也有不少聯想,所以才令聯想股價一騎絕塵,由月中的20元飊升近70%。聯想控股管理層一直覺得市場過份低估公司價值難,現在的「紫光效應」推動股價急升,一眾高層唔知有無一朝得志之感。

  聯想控股究係咪好似紫光透射出嚟咁樣,屬於好抵買的股份,其實結論都係屬於估值的藝術。聯想控股主力係IT、新產業作投資,過去有唔少成功項目,譬如好似神州租車(699),有咁眼光的管理層,投資者應該好捧場。但現實就係,市場一向對呢類投資主導的公司,估值唔係高,而且股價差唔多慣例係對比資產有折讓。

  以聯想淨值只有24元計,股價由兩年前上市就由42元一直潛水,不斷向下尋底。若然不是有紫光出現,以之前股價17.1元計,同資產折讓差不多有三成折讓,算是在市場內的合理區間,但亦唔算特別吸引。紫光係佢低位出手吸納,話係睇中公司的投資價值,可以算是合理解釋,但當股價飆升近70%,呢個睇法就應該改變咗好多。

  以兩間性質相近的公司有股權聯繫,最能令股價爆升是出現併購,如果大家只係合作,或者話覺得股價偏低買來投資,咁短線的吸引力就好有限。以紫光買聯想控股的個案,聯控一向股權都唔係咁集中,幾個主要股東持股量都係兩成多或以下,無絕對大股東。雖然係咁,從局外人睇聯想管理水平不弱,紫光買起聯想踢走管理層的機會唔係咁高。如果無收購的話,兩間公司就算有合作產生協同效應,是否足以令大家股價都喺短短時間升值六、七成呢?

  如果無合作、無併購,咁單靠紫光投資,係咪可以長期扭轉市場對聯想作為控股投資類別公司的估值呢?用呢個角度去睇,聯想股價升得咁急,小股東不定好止賺位,等機會去拆呢份聖誕禮。

陸羽仁

hd