金融High Tea——手機股偷金防被咬

        美股調整,港股就靠炒落後的大笨象撐住大市,再創連升紀錄。

  美股三大指數齊齊下滑,主要借中國可能減少買美債的消息,呢個說法來源係無透露姓名的中國官員提出,報道無講中國官方有乜態度,呢個說法令人想起早前,有報道話總統特朗普會將中國為貿易對手,講法相當兇狠,最後揭盅出來溫和好多。

中國拋債似屬口水戰

        中美兩國競爭,明顯係外弛內張,特朗普見到中國領導人就笑騎騎,但背後出招唔係咁客氣。好似呢次稅改,目標之一就係爭取美國企業將喺中國的生產設施調回美國。有政壇猛人最近去過美國,仲同共和黨參議員傾過偈,佢坦言特朗普係本土策略,而且係最着力落實競選主張的總統,好多人以為佢係大隻講的主張,O依家佢都出力推動,好似佢話係墨西哥起圍牆,講完之後靜咗一排,O依家佢又再擺上枱,又有消息話佢會退出北美自由貿易協定。見佢咁樣來勢,中國自然要諗啲招數應對,可以估計減賣美債的消息,好可能係中方官員非正式咁提點吓美國政府,佢哋都有王牌係手,唔係一味任人砌。

        美股借債市消息下調,多少反映市場對利率前景的睇法,美國炒再通脹概念,長遠會推高息口,不利債價。但對於銀行嚟講,就有利拉闊息差,所以滙控(005)喺美國預託證券已經造好,到香港開市繼續成為升市火車頭,漲2.8%,單隻股份已推高恒指75點。大笨象加上早前調整的手機設備股周四反彈支撐大市,令港股呢次叻過美股,恒指收報31120,升46點。

        恒指周四本來低開,中午收市前最多曾跌123點,低見30950;午後跟隨A股造好,締造13連升,累積上漲1885點;國企指數收報12295,上揚6點,成交金額1288.24億元。

        滙控收報84.05元,再創近兩年新高;其他國際金融股同樣造好,渣打(2888)升近3%收報86.7元;友邦(1299)反彈0.2%收報66.7元。相反,連漲多日的港交所(388)出現回吐,收跌1.3%報268.4元,拖累恒指13點跌幅;至於騰訊(700)同樣無力向上,收跌2.5%報429.4元,拖低恒指78點,並為周四表現最差的藍籌股。

鱷口之中炒上落

        早前調整的手機設備股周四反彈,同樣為支撐大市的股份,舜宇光學(2382)收升9%報112.3元;瑞聲科技(2018)則升4.4%收報148.7元,兩隻股份合共貢獻恒指36點升幅,及周四表現最好的兩隻藍籌股。其他手機設備股同樣造好,比亞迪電子(285)升2.7%收報19.02元;高偉電子(1415)則漲1.9%收報2.73元。手機設備股雖然跌下彈下,出出入入好吸引人炒波幅,但呢類股份基本因素大體麻麻,加上估值偏高,炒波幅一旦挾實可能就走唔甩,喺升市中無乜必要咁樣鱷口偷金啫。

  大股之外,內地近日興炒區塊鏈概念股,呢個係金融科技概念,主要用作網絡保安,便利網絡交易。香港無乜呢類科技公司,昨日有人就炒起隻區鏈塊集團(365),收升0.016仙,升咗23%,睇真佢前身係叫做坪山茶業,做飲料生意,公司清盤後賣殼,等緊新老闆注入業務,O依家仲要先合股,所以純係見內地炒佢又炒。佢O依家市值唔夠4億元,齋係殼價都唔算貴,乾炒牛河都可以叫做價錢合理,但暫時就睇唔到同區塊鏈有乜關係。

陸羽仁

hd