金融High Tea——#MeToo股 唔怕兜

  美國聯儲局今個星期舉行議息,本來預期今年美國加息三次,有樂觀派甚至認為只會加兩次,所以今個月郁手加息機會唔係咁高。不過,近排美國經濟數據強勁,加上股市迭創新高,最重要係主席耶倫呢次係最後「揸弗」,佢會唔會臨尾放一放鷹,以示自己有金融紀律呢?

驚耶倫放鷹借勢調整

  喺呢個猜測下,美國10年期國債孳息率一度升穿2.7厘的逾三年高位,嚇到投資者腳軟,股票恐懼指標VIX指數大升近25%,美股腳軟,杜指周一回調177點。

  正路嚟計,耶倫已經準備離任,佢上手主席伯南克喺任內成功對抗金融海嘯,之後啟動縮表計劃,功成身退。耶倫做咗儲局首任女主席,佢被視為鴿派人物,但任內推動美國上調息口,都叫做有所交代,會唔會喺臨尾再伸多一腳,加多次息先走呢?佢如果咁做就有主導下任政策的味道,而且伸多腳若然踢出大頭佛,咁就有可能搞到自己名聲不保,佢會唔會咁有責任感,做埋佢認為應該做的事先卸任,呢兩日就揭盅。對港股而言,恒指累升4000點,A股調整,再加埋美股都回落,任何一個理由都足以令港股下跌。

  內地A股連續兩日回調,主要係上證指數重3500點後,不少圖表派食胡獲利,令指數受壓。內地𠲖家暫時仲未擺脫炒上落市的氣氛,形成過咗3500點就會有人沽貨,要等大市層層上升,慢牛力度先會轉強。

  上證指數昨日收報3488,跌34點;深證成指收報11278點,跌73點,暫時內地見唔到好明顯的壞消息,反而經濟有低位回升跡象,個市調到咁上下,獲利壓力自然減少。喺外圍因素拖住下,恒指收市插咗359點,收造32607;國企指數收報13389,下滑270點,成交1734億元。大股唞氣消息,個市炒吓落後同個別,有唔少資產豐厚的三、四線股趁機出來吸吓睛,追追落後,萬達酒店(169)炒賣產急升22%,做鋁件的麥達斯(1021)再翻炒升36%。

  喺呢啲市況,有中環茶友八卦一番,問點睇隻#MeToo股?茶友所講的#MeToo股係永利澳門(1128)。荷里活女星發起#MeToo舉報運動,揭露圈中性侵個案,呢個風吹向商界,永利大股東兼主席Steve Wynn被指多年來性騷擾旗下賭場的女員工,雖然佢否認咗指控,但已令佢要辭任美國共和黨全國委員會財務主席一職。

平執永利博年尾例旺

  永利澳門控股公司的董事會,亦宣佈成立由獨立董事組成的特別委員會調查事件。特別委員會由母公司董事會公司治理與合規委員會委員,內華達州博彩委員會前成員Patricia Mulroy女士擔任主席。澳門博彩監察協調局日前發表聲明,就史提芬.永利在美國涉及不當行為的事件表示關注,並與永利澳門管理層會面了解事件。消息爆出後,永利澳門股價一度大跌7.8%,收市下挫6.4%。呢兩日永利股價喺低位徘徊,昨日報26.25元,跌0.65元,但就守住近日低位。

  永利老闆今次搞到一身蟻,估計都會有排煩。不過,從過去經驗,呢啲個人事件對已經上咗軌道的公司影響有限,急挫反而係入貨機會。本地股民最熟悉例子係許仕仁案,當時捲入案件的新地股價一度插到90蚊樓下,呢個亦係近年買新地的最佳時機。每年臨近農曆年,濠賭股例必炒一轉,今年中港經濟氣氛唔錯,照計濠賭股有條件年尾例旺,加上金沙股價因為事件打咗折頭,入市兜番兩手博春節前後沽貨,值博率應該高過假期過大海好多。

陸羽仁

hd