金融High Tea——食盡銀行股

        港股彈後反覆,美股情況都一樣,杜指前晚在聯儲局會議期間波動,開市無耐曾勁升二百幾點,之後倒插,然後彈番73點,波幅主要跟隨債市演繹儲局聲明上上落落。

  美債近期升穿2.7厘敏感位,儲局聲明話預期通脹會上升,會去到2%水平左右。債市聽到通脹會升,即時飊高,但好快債息又回吐,個市見債息上升就跌,見債息回穩就彈,形成短期波動,估計美股有可能呢兩日仍會受債息影響,至市場慢慢消化儲局聲明,焦點至會轉移。

業務增速穩步加強

  喺儲局開會前,市場擔心唔怕一萬、最怕萬一,如果主席耶倫係最後一次主持會放鷹,咁就隨時整死老牛。呢個說法有多少係搵理由沽貨,聯儲局主席呢個位,做緊之時係為公眾服務,做完出書演講先係搵真銀之道,做得儲局主席都係眉精眼企,政治同經濟手腕同樣精刮之人,又點會臨尾自己隨便搞衰個主場,整到商界、金融界個個怨聲載道先。儲局O依家話通脹會升,但跟住會穩定,等如話我如果你頑皮,我會打你手板,不過就唔會打死你,個市聽完打手板就窒一窒,諗真又唔係咁大件事啫。

  中央銀行最想金融市場穩定向好,最好慢慢行,所以講話都係想「允執厥中」,但市場充滿頑皮仔,所以央行行長永遠好似校長,個樣嚴肅但心中慈愛,言者諄諄,爆鑊補鑊,所以佢哋口中永遠都有風險,真正含意就要細味佢哋說話內容。

  香港財金官員同外地央行行長一樣,時時都叫人留意風險,因為咁講永遠無錯。好似聽完聯儲局之言,大家覺得美國三月份會加息,但香港幾時跟加呢?財金官員就話要留心息口上升趨勢,講到好快嚟,本地銀行家公開講咗話加息至少半年後,但陸羽仁同中環銀行家傾起,佢就笑笑話仲未睇到苗頭,皆因美國加咗息咁耐,香港雖然無跟加,本地資金其實無乜流失太多,銀行結餘減少,只係銀行體系操作結果,O依間銀行貸款水平唔係咁高,銀根好鬆動,如果按目前估計,美息加多兩次都唔需要加,所以O依家話加息,都有多少吹定警笛話怕有賊而已。

  港息未知幾時加,但通脹同經濟升溫,點都有利銀行股。根據金管局啱啱公佈數字,香港零售銀行去年錄得稅前盈利增長15.8%,較2016年增幅8.3%明顯加快;淨息差由1.32厘,擴闊至1.45厘。銀行業盈利增長非常理想,淨息差擴闊與利息環境有關,資本充足比率亦較良好。細睇貸款數字,去年增長16.1%,較2016年的6.5%同樣明顯加快,境外貸款增長較快,增速由4.5%加快至17.4%。主要數字反映銀行業生意好轉中,稍後公佈銀行盈利會反映業績好咗,如果沒有重大環境逆轉,跟住生意仲會再好啲。本港銀行O依家財務都好健康,基本上樓市借貸比例唔高,如果未來經濟增長持續,仍然有能力擴大信貸規模,估值計落唔係貴。

  每個經濟循環,其實都有啲股份長炒長有。銀行股喺呢一浪就適合呢個玩法。由過去一年睇,大型銀行股好似滙控(005)、恒生(011)都係每逢議息就炒高,若然唔加息就調一調,加息就再炒一炒,所以銀行股玩法最啱係議息前半個月吸納。由於O依家儲局議息前都做足放風工夫,如果放風話唔加息,咁喺議息會議前就食胡,等低位就買番;若然收到風係加息,咁就再坐一會,食埋消息落實呢浸至走。咁樣買銀行股,長揸短炒,就有機會食盡呢個板塊升浪啦。

個股閃崩拋窒A股

  美股高位徘徊,內地A股繼續獲利回吐,加上有個別持續下跌,好似ST股保千里(600074)錄得25次累計跌停,市值縮水超9成;鳳形股份(002760)等十餘隻個股又閃崩跌停,加上中央官員提示金融風險,上證指數收報3446,再跌33點;深證成指收報10864點,跌295點。港股追隨內地回調,恒指收挫245點,收造32642;國企指數收報13434,跌127點,成交1545億元。

  1月份過去,好友大獲全勝,臨尾一日計數食胡,二月份有農曆年假,正路計市場氣氛應該無1月份咁熱烈。今年市場有啲勢頭炒消費股,萬洲國際(288)逆升0.52%,收報9.74元。澳門博彩監察協調局公佈,1月份博彩收入262.6億澳門元,按年增長36.4%。呢個數字係1連續錄十八個月上升,勝過預期。濠賭股午後普遍造好,澳博(880)收報7.95元,升1.8%;銀娛(027)漲0.7%,報69.8元。

陸羽仁

hd