金融High Tea——跟紅頂白釀閃跌

        美國債息大升觸發市場情緒,華爾街股市急挫,引發環球股市大插,是否成災,要睇跌勢會擴大還是回穩。環球主要市場全面下瀉,虛擬貨幣市場急挫,據交易平台Coindesk數據,比特幣盤中曾跌穿6000美元關口,低見5995美元,最新報6247美元,跌9.65%,比特幣由高位20000美元跌到咁,已經成為資產市場首個被刺穿的泡沫。

  中環茶友笑言,早前玄學大師蔡伯勵為來年拆局,預言是木剋土艱難之局,對股市不宜過份樂觀,仲話牛市旺勢到春節而止,如今大師講法先應驗左一半。

  蔡大師同茶友講,來年五行欠木,雖然細睇流年藏木,但唔係幾夠力,所以狗年挑戰大。市場見股市一片暢旺,話恒指睇35000點,佢就唔敢咁樂觀。當時恒指大約32000點,升勢仲係好凌厲,大師就話O依家仲未到狗年喎,升埋呢浸就要停。

CTA策略加劇波動

  大師講完,茶友記在心中。佢話,流年係社會共業,觀乎股市喺呢輪升得咁勁,傳統智慧話,暴雨不終朝,升得急就會跌得急,此乃慣常。只不過大市先前急升,離場會錯失機會,如果貨少不妨死坐而已,所以大師之言,亦是常理之中。

  全球資產市場股市龐大升幅,等如落雪堆積,只待一聲雷響觸發調整,比特幣出左期貨後就畀人沽到阿媽都唔認得,衍生工具成為震破虛擬貨幣泡沫觸發雪崩的雷聲。

  股市呢兩日閃跌,呢聲雷響係乜呢?大行高盛話係量化基金啟動激進拋售模式,觸發股市大跌,佢估計量化對沖基金的CTA(Commodity Trading Advisers)策略模式引發的拋售,是跌市元兇,CTA策略簡單講就係散戶跟紅頂白的2.0版,利用電腦技術見升追升,見跌追跌,波動性成為獲利來源。

  高盛仲話,標普指數2735點係趨勢轉捩點,跌穿此位置會觸發CTA策略量化基金激進拋售,昨日標普指數從2750點下挫至2649點,於是觸發大量跟風拋售。對於美股閃跌引發後果,高盛亞太區首席經濟分析師迪安竹(Andrew Tilton)認為近兩日恒指波動不是股災先兆,因此無改變香港經濟前景預測。佢估計,隨著美國聯儲局緊縮政策發展,更多地區中央銀行會推動加息,但中國和日本將避免貨幣緊縮政策。

  對於跌市影響,茶友同意高盛分析師意見,話程式交易造成跌市唔係新鮮事宜,1987年的全球股災,就係美國加息誘發程式沽盤,造成閃跌,事隔30年,新一代投資者未見過,歷史就再重現。從基本面睇,呢次由債息飆升觸發跌市,從病理學上講乃係熱症,需要飲涼茶降溫,但當個人熱辣辣,飲涼茶淋冷水就好易頭暈暈。理論上熱症好過虛,因為如果降溫太厲害,咁咪唔好飲涼茶住囉,最緊要係唔好跌市跌出禍,出現系統性風險或者衝擊實體經濟。從呢個思路睇,如果股市跌到咁上下,政府或央行就會維穩。不過,茶友咁講係從大圍預測,究竟政府幾時出手,仲要睇具體狀況,所以兜底入市,仲要小心而行。

  受到美股下插影響,連A股都頂吾順,內地股市都滑落,早盤受外圍股市大跌影響,午後再度下行,創業板指數全日大跌超5%,創近三年以來新低,上證50和滬深300指數跌近3%,兩市成交量均較前一日加大。上證指數收報3370點,跌116點;深證成指收報10377點,跌458點;創業板指數收報1598點,跌90點或5.34%。

美股期貨急插後回穩

  中美跌市拖累港股大幅向下,收市跌穿32600點,以近全日最低位報收30595點,急挫1649點;國企指數收報12686點,瀉793點,成交創新高,錄得2580億元,較2015年4月8日創下的舊紀錄2523.96億元更多,唔排除香港都有類似CTA的沽盤觸發走貨潮。藍籌全面急插,股王騰訊(700)急插7%,報410元;平保(2318)跌6%,收報84.35元;港交所(388)插6.8%,收造266.8元,前日逆立的內銀股紛紛追跌,建行(939)重挫7.7%,收報8.32元;工行(1398)下滑7.3%,收報6.9元;中行(3988)急跌6%。大笨象滙控(005)跌3.3%,收報80.1元,已經算係叻。

  港股下午跌幅加劇,原因之一係美股杜指期貨在香港時間下午兩點幾,仍再插近600點,不過之後美股期貨後來回穩跡象,在港股收市之後,在香港時間下午五點多,杜指期貨行情大反轉,由跌轉升,反彈100多點,港股會唔會止瀉或反彈,好睇周二美股表現。

陸羽仁

hd