金融High Tea——買MeToo股避過小股災

        美國股市繼續Chok,杜指先升後跌,繼續打底。喺市況大上大落之期,無綁安全帶之炒友已經一頸血。

  內地股市同美股一樣,近日都回得較急,昨日出現大股同二、三線個別發展,上證綜指午後一度跌至半年低位,反而細股主導的創業板指低開高走。上證指數收報3262點,跌47點;深證成指收報10372點,升125點;創業板指數就報1641點,升25點。

  A股沽壓O依家呢輪集中權重板塊,主要係權重藍籌板塊積累獲利盤較多,造成沽壓。內地權重股受壓,對港股都有影響,恒指雖然收升128點,報30451點;但國企指數就收報12380,反跌52點;紅籌指數收報4459點,跌5點,成交金額1491.83億元。內地有掛牌的工行(1398)再跌0.9%,收報6.72元;中行(3988)跌0.5%,收報4.28元;國壽(2628)跌0.8%。同A股相關的南方A50(2822)下滑2.4%,收報16.22元;恒生H股(2828)跌0.3%,收報124.9元。

低吸A股過新年

  雖然內地股市氣氛弱,又話有外資撤離,有券商就認為A股權重指數估值水準,比較其他主要股市仍然偏低。2018年A股在宏觀經濟環境穩定大背景下,估值再調低機會唔係咁高,短期回調可能令市場更具投資價值。經過震盪後,市場開始有中線低吸想法。

  國泰君安做過簡單統計,從過去10年經驗,「買貨過年」策略取勝率更高,春節後獲得超額收益機率相對其實高,今年股市喺過年前回調多啲,大媽用呢招贏面可能就更大。以一個新興市場計,上證綜指平均歷史市盈率17.9倍,比起其他市場又真係唔算貴。

  有老友打電話來,話早前睇咗我講,買入MeToo股永利澳門(1128),避過今次小股災咁話。我都無留意永利股價,一睇佢昨日大升8%到27元。搵番當日在1月31日叫人買呢隻MeToo股時,佢跌到26.5元,如今小執1.9%。

  買永利執的錢唔算多,但當日恒指在32607點的高位,如今跌了2156點,跌咗6.6%,一來一回差8.5%,買咗呢隻MeToo股絕對跑贏大市。

撈底要細心睇跌因

  永利大升皆因捲入MeToo風波的老闆史提芬永利決定辭任後,委任獨立非執行董事盛智文擔任非執行主席,並將非執行董事麥馬度調任為執行董事,委任他為行政總裁,即時生效。盛智文接受電視台訪問時指,公司業務如常運作,對續牌有信心。

  盛智文做咗千億企業的精神領袖,都係相當威水。他的強項係公關,兼且係福將,喺佢領導下,海洋公園盈利甚靚。佢卸任無耐,就撞正踢喼風波,內地遊客大減,海洋公園連年虧損。永利呢次出事,唔係業務有問題,而係老闆形象出事,搵盛智文接替,應該好啱波路,相信事件可以平息,難怪永利股價大升。唔係所有大跌股都可以撈底,要細心研究跌因,好似史提芬永利遇上MeToo事件,佢年紀都咁大,交棒好正常,好難因呢件事搞死間公司,所以先叫大家買呢隻MeToo股玩吓。

  春節前本來係炒濠賭股季節,但因為大市急挫,加上傳出內地會放寬海南島搞博彩,令到濠賭股炒作走勢斷咗纜。澳門賭業大勢仲有好多不明朗因素,包括盛智文提到的續牌安排、中央對博彩政策,長遠而言會影響濠賭股估值,所以買呢個板塊同過大海一樣,要鋪鋪清,唔好一味諗住死揸唔放。買咗永利若再抽高,可以沽咗佢先,然後等大市回一回再換番銀娛(027)。

  睇番呢輪表現,澳門酒店春節訂房聽聞相當爆滿,利好因素仲未消化,所以個市再下插時,想搵短炒對象,可以考慮銀娛呢類強勢濠賭股走一轉。

陸羽仁

hd