金融High Tea——九巴有排煩

        香港二月份有啲黑黑地,股市由月頭一直跌,跌到穿晒位。錢財身外物,最令人神傷係過年前發生九巴車禍,成為近年最嚴重交通事故,台灣花蓮發生地震塌樓,死亡人數都唔夠一架巴士出事多。

  喺發生慘劇後,九巴控股公司載通(062)股價一度逆市下插創出一年新低,收報23元,跌1.3%。中環茶友係載通股東,佢坦言公司危機處理好似總係慢一步,應對有啲令人失望。

公司應對令人失望

  茶友話,佢失望唔係因為載通股價下滑,而係覺得公司喺應對上做得唔夠。茶友最唔明白係,當車禍發生後,公司發表聲明話肇事司機過去紀錄良好,但跟住就俾傳媒揭發佢曾經有不小心駕駛紀錄,公司之後先至糾正番。作為上市公司附屬機構,喺呢啲敏感時刻公佈出來的資料,點解會有咁大偏差?究竟公司有冇做好紀錄保存呢?

  另一樣茶友好奇怪嘅係,點解死咗十幾人,出事當晚只有總經理出來回應,翌日先見到主席梁乃鵬出來,昨日先見到公司董事總經理喺大埔區議會露面道歉。大埔成為災區,區議員喺會議上狠批,管理層喺鏡頭前受靶,真係非常被動。睇番政府一出事,特首林鄭已經改變行程,由去紅館變為去現場,其他政務司司長、運房局局長好快出嚟講嘢,基本上係空群而出。而且九巴最初出手補償咁低,每個死者只有幾萬銀,後來其他公司捐款好似仲慷慨過事主?如果再深層次啲去睇,九巴點解會容許巴士司機兼職,佢對員工培訓係點,必定會畀人追究。

  巴士司機難請早已人所共知,相信公司就用兼職去應付。茶友話,O依家好多基層工種都缺人,要請人當然要加薪加福利,同時仲要改善形象做工夫。公用事業好似兩電一煤都用咗唔少資源喺呢方面,巴士公司普遍喺呢方面都無乜追上形勢,結果濫竽充數就爆出大鑊。由於呢次事態嚴重,將來調查管理層責任令人關注,就算最後無人要負責,當局都有可能會大力收緊標準。

  茶友話,佢持有載通多年,公司最賺錢其實唔係做運輸,而係將廠地起樓,O依家集團手頭都有唔少物業收租,兼且仲有個大項目就係重建觀塘車廠。至於做本地巴士生意,變成微利生意,兼且成日受油價影響。從公司角度睇,當局主張鐵路優先,搞到公司變咗二奶,要喺夾縫中生存,又要應付區議會各種要求,惟有樣樣都要慳。不過,人命安全係運輸業不應妥協的標準,呢次出咗咁大件事,詳細成因仲要調查,但至少從危機應變,就暴露咗好多問題嘞,將來生意恐怕仲難做。

中移無份升有份跌

  九巴事故搞到全城愁雲慘霧,股市都黑氣未除。恒指高開205點,一度重返100天線29618,中午收市前曾漲294點,高見29801,可惜到收市前力度不繼倒跌。恒指收報29459,跌47點;國企指數收報11900,跌1點,成交1349億元。投資者繼續減磅,連去年跑輸大市無乜升的中移動(941)都被人質,股價創逾一年新低。中移動去年4G上客量達1.14億戶,超過公司定下上客1億戶目標,但在降費提速國策及同業競爭,電訊營運商只能薄利多銷,導致中移動去年人升佢呆。

  匯證早前就將中移動目標價降至87元,因中移動進入5G投資周期,今年派息比率僅微升2%至48%,搞到中移動昨日以全日最低位收市,報74元,跌0.6元,變成無份升、有份跌。表現比較好的則有舜宇(2382),公司發盈喜,股價跑贏大市,今日收報112.6元,升3.8元,由於股價連升三日,累積升幅達8%。同時公司一月份手機鏡頭出貨量按年升19.6%,主要係集團另一主打業務物車載鏡頭按年升19.4%,達324.6萬件。

  另外,新股氣氛麻麻,機電工程服務供應商熒德控股(8535)首掛,收報0.136元,較發售價0.17元,下跌20%,不計手續費及佣金,一手兩萬股蝕680元,係輸得最甘的首掛股。

陸羽仁

hd