金融High Tea——銀行股順周期有景

        新春唔少團拜,亦係收料時機。今年幾間大銀行公佈業績,業績好之餘,香港賺錢仲特別標青,好似渣打銀行(2888)呢期業績唔錯,而且仲恢復派息,陸羽仁呢兩日遇到中環大銀行家,自然請教佢經濟同銀行股前景。

  講到經濟同銀行生意,大銀行家就笑晒口,話早幾年全球經濟仲係唔明朗,最慘係利息低迷,息差收窄,間間銀行都捱世界,O依家情況啱啱相反,經濟向好,而且前景相對穩定,經濟好利息上升,放貸收入增加。早幾年有點頭頭碰着黑的味道,O依家感覺相反,瓣瓣都順咗。

或加四次息壓抑股市

  大銀行家話,呢啲係循環性行業特色,好似做公用事業如電力生意,好景順景差唔多,但循環性行業衰起上來就屋漏兼逢連夜雨,好的時候就時來風送滕王閣,錦上再添花。銀行生意就係咁樣,經濟差時息口又跌,收益下降之餘仲要為問題貸款撇帳,O依家唔止撇帳減少,隨時仲有回撥。

  聽完佢咁講,咁銀行股係咪一定得呢?佢即時回應,生意和股市表現係兩回事喎,有時經濟好唔代表股市升,因為股市有利率、估值同市場情緒等因素,股市係經濟反映,但同時亦係炒預期,兩者不能畫上等號。

  聽完大銀行家之言不無啟示,去年本地經濟好景,今年勢頭更旺,呢啲已經喺股市先前大升中反映出嚟,未來要睇好景維持機會有幾大。美國持續增長多年,時間接近歷來最長,美國利息亦由低位逐步回升,O依家聯儲局好似揸住架上衝的飛機,機師都知方向不能永遠向上,關鍵係點樣令佢上升時間拉長,或者避免俾佢下滑。聯邦儲備局主席鮑威爾日前暗示,今年可能加息四次,都係個重要訊息,反映央行加大力度控制上升速度,唔畀經濟過熱,咁對股市都有抑制作用,所以買股要跟住機師盤軚去走,喺「鮑市」買股,唔可以心急期望個市好似去年咁大升急升,反而要適當保持耐性低吸。

  睇番渣打業績,過去幾年佢一度因為大宗商品貸款撇帳令業績大受衝擊,搞到要暫停派息,股價一度插水。集團公佈去年除稅前法定溢利,按年大升4.9倍,至24.15億美元(188.37億港元),純利為7.74億美元(60.5億港元),成功轉虧為盈之餘,董事會決定恢復派息每股11美仙。

動作多股價唔再慢熱

  受消息刺激,渣打香港股價上升,昨日就隨大市回調。管理層表示,去年渣打股本回報率,雖由前年的0.3%提升至3.5%,但仍未達8%目標,期望中期收入可達複合年增長5至7%目標,並能控制成本增幅低於通脹,以致中期可實現逾8%的目標。現時渣打市盈率47倍,息率不足一厘,未來股價表現要跟銀行股大圍走,同埋睇佢業績復甦力度能否加強嘞。

  越秀地產(123)公佈2017年全年業績,盈利22.6億元人民幣,按年增47%;每股盈利18.23分;派末期息5.2港仙,全年每股派息按年增長41.5%,全年派息總額約佔核心淨利潤的40%,管理層解釋主要係考慮到收益上升,派息不妨豪爽啲。同系越秀房產信託基金(405)公佈,2017年全年可分派總額8.26億元人民幣,按年增0.2%,每個基金單位盈利0.49元,公佈後越房收報5.2元,跌1仙。

  越秀股價一向慢熱,今次派成績表後股價升逾7%,收報1.66元。上一年越秀地產加大土地儲備力度,又向集團旗下越秀房託出售武漢物業67%的權益。越秀地產是國內唯一一間發行過海外REITs的房地產企業,因此該集團多年前準備在內地發行房託相關工作,試圖成為首間內地發行的公司。據透露,目前該公司已經準備多個核心商區的項目,作為內地發行的目標。

陸羽仁

hd