金融High Tea——馬化騰風頭蓋兩會

        港股調整調開有條路,美股上周先插後穩,美國早前大加鋁、鋼關稅,所掀起的貿易戰疑雲未解決,突然再嚟多兩腳意大利政局不明朗,以及內地大減通話費令電訊股急挫,結果恒指跌近700點,收市報29886點。

  意大利國會選舉在香港時間周一早上六時結束,按照初步票站調查顯示,未有單一派別能達到四成票數籌組政府門檻,可能出現懸峙國會,疑歐派的「五星運動」取得選票較預期多,成為投資市場不明朗因素。

  另外,總理李克強在政府工作報告表示,要加大網絡「提速降費」力度,移動網絡數據流量費用年內至少要降低三成。中資電訊股全線受壓,中移動(941)跌3.2%,收報70.3元,股價跌至三年半低位,中電信(728)亦跌2%,收報3.35元;聯通(762)大跌6%,收報9.36元。

大市急插逼近上升軌

  恒指急插697點,大市交投活躍,成交額1185億元。獲10隻紅籌及民企周一加盟的國企指數,收報11991點,跌212點。睇番大市去到呢個位,距離上升軌只有100點左右,理應有較強支持,若然插穿走勢就會幾肉酸,屆時回吐就變咗嘔吐啦。

  除咗外圍,市場都聚焦兩會,李克強要求電訊公司減費,即刻觸動股價神經。騰訊(700)主席馬化騰作為來自深圳八位全國人大代表中唯一的連任代表,就繼續以「互聯網+」做主題,在人大第一次會議上一口氣提交八項建議。

  馬化騰喺會上提出加快建設數碼中國(內地稱數字中國),不斷增進民生福祉。佢話過去一年看到大數據、雲計算、AI發展很快,已擴展到智慧城市和政務應用等方面,各地政府紛紛開啟數碼化日程。因此,他今年帶來第一項建議是《關於加快建設數字中國,不斷增進民生福祉的建議》。在「數碼中國」建設議題下,從工業互聯網、數字文化、金融安全、醫療健康、青少年創新人才培養五個領域切入,提出「一帶五」具體建議。

  關於加快建設數碼中國,馬化騰建議,整合現有數據平台,分步推進重大數碼基礎設施建設;積極推動公共數據開放,在條件具備的部門或地區示範建設公共數據開放平台和數據產品流轉平台;加強數據相關市場機制建設,維護健康有序的市場競爭秩序。同時,建議出台社會力量參與數碼中國建設激勵機制;推動基礎科研,推進基礎標準制定,參與國際網絡空間治理體制建設,擴大中國話語權和影響力。

  佢仲話,過去大家所用的基本都是消費互聯網,未來還會滲透到工業互聯網中,他舉了一個養雞例子,很多雞都是45天速成的,消費者願意付更多的錢,買一隻90天養成的雞,只要生產企業內部IT化、信息化,將這些數據放在雲端,消費者就能夠購買的產品實現可溯源、可訂製。

  馬化騰經常掛喺口邊,騰訊的生意其實都係文化生意。目前文化消費佔居民總支出10%左右,未來文化消費需求非常旺盛,應該要做文化精品,才能推動經濟發展,促進國家提升文化軟實力。過去不少中國傳統IP都與騰訊有過合作,像長城、故宮、敦煌等,通過「互聯網+」讓這些傳統文化煥發出生機。佢認為「文化要跟科技結合,很多新技術可以應用,如AR(增強現實技術)、VR(虛擬現實技術)、AI(人工智能)等,數碼文化是未來方向。」

騰訊股價下插低收

  佢亦提到互聯網金融,他有另一個睇法,認為最重要的是穩定和穩健,金融是一個長跑,不是比誰跑得快,而是誰跑得久,這才是關鍵。佢建議發展金融監管科技,打破信息孤島,推動人工智能等技術在防範風險方面應用。

  除了文化、金融,他還在醫療、青少年教育等都有建議。呢啲建議相信唔係佢自己個人提出,而係佢屬下業務主管集大成,透過老闆把口提出,所以內容好精細,而且迎合官方政策。騰訊與阿里巴巴早前不斷入股衣、食、住、行,內地評論係兩大超級網企要包起大家生活各方各面,從今次佢發言,可以見到騰訊呢個野心。

  有人話,中國政府唔會想喺自己治下出現一、兩間呢啲超級企業,馬化騰的建議就算中央認同,是否等如俾佢去做係另一回事。本來,騰訊老闆大出風頭,股價應該要借機大炒,結果昨日卻成為推低大市主力之一,股價跌咗2.5%,收報425元,比大市跌2.3%仲要多,咁係咪代表個市有暗湧,抑或市場對馬化騰呢種高調出招有戒心呢?

陸羽仁

hd