金融High Tea——一期一會炒軍工股

  大市反彈624點,順手炒埋軍工股。總理李克強向全國人大遞交預算草案,透露今年國防預算高達一萬一千億元人民幣,即時刺激軍工股攀升。軍工股每逢兩會都有炒作,現今又是一年一度燕歸來。

國防預算大增惹憧憬

  內地公佈,今年預算比去年實際完成軍費增長8.1%,是近三年國防預算增幅最高的一次。自2006年至2015年間,除了在2010年中國的軍費增幅為7.5%外,其他九年軍費增幅均有兩位數。2016年,中國軍費預算增幅降低到7.6%,去年再降低至7%,今年則回升至8.1%。如果用生產總值去計,中國今年國防預算約為去年中國國內生產總值(GDP)1.5%。內地軍事分析家認為,相對於世界其他主要大國,中國國防費無論是佔GDP比重,還是國民人均和軍人人均數額,都是比較低的。

  但在軍費開支增加消息刺激下,內地航發股昨日一早拉升,軍工股中航科工(2357)收市升13%,報5.06元、中船防務(317)升5%,收11.62元,甚有一期一會炒番轉味道。​

  另外,發改委表示,消費對內地經濟增長有積極拉動作用,內地消費股發力,旺旺(151)收升4.4%,報6.4元,為表現最好藍籌股;蒙牛(2319)收升4.2%,報25.8元,為表現最第二佳藍籌股。

  新春期間,內地最暢銷電影係港人投資同導演的《紅海行動》,去年內地最收得兼且打破紀錄的《戰狼II》,同樣係以解放軍為背景的電影,反映軍事片係內地成為最火紅片種。《紅海行動》早前喺香港開畫,有中環茶友睇過,佢話成套片最大賣點係用咗中國先進軍艦作為背景,電影開頭有小小傳統內地片味道,跟住就一路不斷有槍戰場面,集合咗《黑鷹72小時》、《雷霆救兵》等大片精華橋段。有人會覺得佢原創性不夠,但論娛樂性同官能刺激就一啲都唔失禮。按照呢個進程,相信內地軍事片將來水準會不斷提高,同荷里活電影正面較勁。

  內地軍事片大旺,反映國家主席習近平的強兵思想。去年習大大來一場沙場閱兵,突破過去廣場閱兵做法,突出解放軍能打的形象,喺民間形成風氣,加埋國防預算增加,令軍工股受到追捧。要留意的是,是軍工股係國家企業,底質唔衰得,但平時唔會有太多消息,係風格較為沉悶股份。兩會係發佈國防消息場合,形成呢類股份炒作季節,炒季過後好大機會轉歸沉寂,所以如果手頭有貨賺錢者可以睇位食胡,未有貨者就不宜高追嘞。

特朗普彈弓口推升股市

  軍工股昨日炒起,同大市反彈都有關係。全球股市跌咗兩日後普遍反彈,特朗普提出徵收鋼鐵關稅,各國都有回應,外電引述一份歐盟草擬報復清單,歐盟委員會提議對美國鋼鐵、服裝、紡織品、鞋類和特定工業品徵收報復性關稅。清單還包括電單車、牛仔褲、玉米、波本威士忌及橙汁等。

  美國總統想打貿易戰,無論真假都好,首先要面對國會意見多多,加上搞到股市大跌,特朗普語氣都轉軟,不排除對盟國有啲讓步。佢解話時亦鬼拍後尾枕,話開徵關稅係爭取其他國家放寬俾美國企業打開門做生意。美國股市早前在貿易戰聲中而跌,特朗普見勢色唔對,風向就有啲吹番轉頭。呢個亦係佢的典型作風。

  喺特朗普放軟口風下,中港股市都好番啲。上證指數收報3289點,升32點;深證成指收報11007點,升132點。恒指前日急挫,昨日出現報復式反彈,下午一度差不多收復失地,最後指數重返三萬關樓上,收報20510點,急升624點;國企指數收報12311點,急升319點,成交1165億元。

陸羽仁

hd