金融High Tea——超購王宜抽不宜追

        市場投資氣氛近日都幾唔穩定,大市擺脫唔到日彈日跌形態。白宮經濟顧問科恩請辭,美股反應暫時唔大,但嚟到港股就成為壓力,令市場下擺震盪,掃走咗前日一半升幅。

美國小震香港中震

  外界理解科恩辭職係不滿總統特朗普徵收入口鋼鐵和鋁材關稅。隔晚杜指曾挫逾400點後回穩,中港股市就無咁好彩,上證指數下挫跌穿水平線,臨近尾盤跌幅加劇,深指表現疲軟,跌幅擴大。上證指數收報3271點,跌17點或0.55%;深證成指收報10904點,跌102點。恒指周三同樣低開186點,午後跌幅擴大,最低曾見30117點,最多挫393點,收報30196點,下挫313點;國企指數收報12180點,下跌131點,成交金額1133億元。

  由於震源係貿易戰,相關股份受壓,馬鋼(323)跌5%,收報3.75元;鞍鋼(347)跌4%,收報8.04元;江銅(358)跌2%,報11.88元;俄鋁(486)跌3.7%,收報4.99元。能源股同樣無運行,神華(1088)跌4%,收報20.85元;中海油(883)跌2%,收報11.02元。

  科恩本身係高盛前高層,呢個背景除咗係建制精英外,同時代表華爾街利益。華爾街利益同打工仔階層利益好唔一樣,主要係受財團影響,有人形容科恩係溫和派,呢啲係個人作風,但真正支持佢的是財團利益,當然唔想觸動貿易穩定,咁樣不符既得利益者立場。可以想像特朗普要打亂現有秩序,華爾街股市因而下跌,科恩受到壓力有幾大,前日特朗普口氣轉軟,美股回穩,但對既得利益者而言,咁樣仲未足夠,從不同跡象嚟睇,華爾街同特朗普角力仲未結束。

  美國打貿易戰,肯定其他國家受到衝擊更大,所以科恩辭職,喺本國形成三級地震,香港就變成七級地震,威力大咗好多,搞到港股彈完又跌,完成唔到兩日升勢,上落市形態暫時未能打破。

  市況波動下,呢排仲有好多新股上市。做茶的賓仕國際(1705)錄得超購2600倍,成為本港超購王第二位。證劵業人士估計,有圍內資金作部署,料不能每人一手。

  賓仕國際在昨日結束招股,錄得約2600倍超額認購,凍結資金約260億元。若以上限一元定價,集資一億元,有近五萬人認購。保薦人為力高證券。公司生意主要有兩樣,一樣係分銷及營銷多元化海外品牌食品及飲料產品組合,當中包括「味覺糖」糖果。另一樣零售業務係經營海外食品及飲料品牌零售店,包括該公司主要零售品牌「天仁茗茶」,該品牌在香港連鎖茶飲市場排行第一,佔據約24.3%市場份額。

唔係大旺市 炒新股要小心

  點解賓仕呢次咁墟冚,相信係同天仁茗茶名氣有點關係,但主要都係有資金大舉認購,以其爆飛倍數只係輸俾超購王Magnum(現稱奧克斯國際)(2080)超購逾3550倍。Magnum當年以1.5元上市,主要經營夜店業務,掛牌後不久便升至高位,見2.84元,其後從高位回落,低見0.76元。該股昨日收市價為1.59元,與2015年的高位3.26元距離接近一半。呢個都係好多超購王表現。

  呢半年有唔少表現精采新股,好似閱文(772)、希瑪(3309),佢哋掛牌高追都有着數,但睇番當時都係個市大旺,指數整體向上,資金相常充沛,有利炒作,但高位追貨者都有相當機會接火棒中伏,真正有錢賺者都可能係認購時入票博分餅仔者。現今個市咁波動,小小地落注認新股博大霧無所謂,若然係掛牌後重注高追,就要小心唔好入咗迷魂陣至好。

陸羽仁

hd