金融High Tea——會德豐執地開餐

        外圍政經消息轉好,港股順勢彈上,單日升近600點。周日立法會補選建制派和泛民平分秋色,內地通過憲法改革,都係重要政治事件。除此之外,中環茶友就留意到會德豐喺將軍澳賣樓,結果首批單位賣清。

《預算案》無辣招,自然有利發展商出招,呢個結果唔意外。反而話題係同一時間,會德豐就買入左海航集團在啟德塊地,副主席梁志堅忍唔住話係good buy。

  當年海航來港,以高價接連投得啟德四幅地皮,有大發展商主席失控痛斥為「癲價」。海航現時正進行資產重組,該集團核心業務是航空及旅遊相關產業,非相關業務會逐一處理去改善現金流,在這個狀況下,香港地皮都要搵人承接。這些當年被形容為「貴地」,現時賣出價比當日更高,應了一句「昔日癲價,今日市價」。

左手賣樓 右手買地

  有做地產的茶友話,佢地之前有競投過安達臣道住宅地,結果不敵華懋,當時成交價每方呎1.2萬元。呢個區無港鐵都有呢個價,啟德成交價計落真係唔貴,所以堅叔忍唔住偷笑。睇番佢地周日賣單位,首批套現近50億元,差唔多夠俾地價,佢左手賣樓,右手掃地,走一轉又食番一筆,你話香港地產幾好做?

  海航出售的第一幅啟德地皮,賣了給恒基地產,這次出售的一幅地皮則由會德豐購入,佢賣埋手頭最後一塊地皮,雖然可以套現,但也有點退場味道。佢用高價在香港投地,最主要原因當然是看好香港房地產前景,樓市未來還會上升。他們不以高出市場價格投地,因為唔係咁根本不可能投到大幅地皮,結果就俾人唱衰佢炒貴香港地皮,又散佈佢買貴地做法過勇。

  O依家海航真係賣地,原先傳出佢想搵本地發展商合作,但未埋欄就已經唱通天,最後都係要賣地了事,證明商場如戰場,一啲都無講錯。呢一役本地發展商唔止執左平貨,喺戰略上仲再勝一仗。會德豐昨天就升左0.55元,收報59.85元。早前執左平地的恒基(012)就收報52元,升0.65元。

  海航賣地之後,茶友坦言本地大發展商食左大餐,佢地一向惜地如金,早幾年內房商搶地搶得厲害,佢地先肯摵小小家底出嚟用,搵啲農地補吓價,O依家手頭土地儲備多番,內房商見到海航遭遇,相信都唔敢太進取,所以大家不妨放長雙眼睇吓,本地財團是否願意再拿出他們手頭珍藏的土地儲備起樓。

  海航要重組,唔知係咪因為呢個消息,大家覺得佢同系公司都會無咁進取,所以同佢一樣經營航空生意的國泰股價呢排都靚仔左。海航喺內地掛牌的航空公司都停牌配合重組,國泰母公司太古早前就宣佈換大班,現任大班史樂山會專注協助國泰完成三年重整架構工作,反映集團重整軍容行動,唔會因為換左大班有變。

  講返個市,藍籌股昨日幾乎全線向上,由於市場對加息加快憂慮暫時紓緩,國際金融股向好,滙控(005)收升1%,報77.4元;友邦(1299)升2.7%,收報67.75元;「股王」騰訊同樣交足表現,收升2.9%報460元。

  此外,中資金融股走勢大勇,建行升3.7%收報8.5元,為表現最好藍籌股;工行(1398)收升2.5%報7.05元;中行(3988)升2.8%收報4.36元,3隻股份合共貢獻恒指163點升幅。

  手機設備股延續上周升勢,舜宇光學(2382)2月手機鏡頭出貨量增長加快,獲多間大行看好,舜宇光學收升0.6%報144.7元;瑞聲(2018)收漲0.8%報160.6元;中興通訊(763)升2.8%收報29.45元。

  沙特阿拉伯國家石油公司沙特阿美(Saudi Aramco)據報可能推遲至明年才上市。沙特皇儲穆罕默德(Mohammed bin Salman)上周訪問英國,與當地官員會之際,《金融時報》就爆出呢單料。港交所(388)想爭取呢隻巨無霸香港上市,但熱飯唔可以熱食,心急都冇用,港交所股價外無受沙特阿美開慢車影響,收升2.8%,報292.2元。

陸羽仁

hd