金融High Tea——短痛好過長痛

中美貿易戰拳來腳往,美國公佈對500億美元中國貨物的制裁清單,港股開市仲無乜大鑊嘢,但隨著中方對貿易戰不斷發表言論,股民見勢色唔對路,個市開始向下尋底,臨近收市中國宣佈向美國價值500億美元貨品報復徵稅,個市愈插愈急,最終跌超過600點收市。

  睇番內地股市跌幅無香港咁大,相信同中港兩地放假前,北水減少來港,令到跌勢衰多兩錢重。

即日還擊有訊息傳達

  中國國務院關稅稅則委員會決定,對原產於美國大豆、汽車、化工品等14類106項商品,加徵25%關稅,實施日期視乎美國政府對中國商品加徵關稅實施情況,另行公佈。中方行動被視為對應美國周三公佈一份涵蓋1300種中國產品清單,涉及工業技術、運輸及醫療等領域,將會徵收25%入口關稅。

  美方將就關稅徵詢公眾意見,諮詢期至下月11日,期間關稅不會實施。

  國家商務部副部長王受文話,如果有人堅持要打貿易戰,中國會奉陪到底,但若有人願意談,大門永遠打開。

  美國總統特朗普向中國貨物增加徵稅,中國O依家開大擺硬。從中國角度,開軟開硬有不同考慮,特朗普打保護主義牌,相信主要係撈取政治本錢,為中期選舉造勢。要考慮係中方擺出低姿態,特朗普會唔會罷手,睇過佢過往鍊到盡性格,北京決定要開硬,而且仲係要即日還擊。

  中國這樣快的還擊,都傳達咗一個訊息,就係兵來將擋,水來土掩,睇吓邊個怕痛啲。如果中方無睇錯,特朗普係想為選舉抽吓水,北京O依家同你搏拳,等如係打落美國選民身上,內地無選舉考慮,咁特朗普你係咪真係捱得痛先?

無北水騰訊全程捱打

  從呢個角度講,中國大力還擊,等如縮短咗第一回合埋牙時間,特朗普出招同內地反擊的衝擊差不多同時浮現咗,股市唔使等中國還招先至跌,反正要痛,長痛不如短痛。往後就要睇特朗普係咪繼續再出招,要再打下個回合、抑或係埋枱傾嘞。

  喺貿戰陰影下,恒指下午跌穿三萬關後仍未止瀉,收報29518點,大挫661點;國企指數收報11857點,下滑279點;紅籌指數收報4356點,成交只有1090億元。大跌市成交咁少,反映北水喺假期前無得流入,都加劇咗跌勢。

  因為少咗北水護航,騰訊(700)全日捱打,以全日最低位收造397.6元,跌2.9%,成交額有成144億元。多隻內銀股臨近收市前跌幅擴大,建行(939)收跌3.8%,報7.81元;工行(1398)跌3.5%,收報6.58元;中行(3988)跌2.8%,收報4.14元。

  不過,唔少強勢紅色股唔想跟跌咁多。A股唔少藥業股炒到停板,香港掛牌的藥業股都跑贏大市。由於喺港股尾段中方報復名單已公佈,杜指期貨都大插444點,反映咗埋牙的消息。O依家呢啲政治市,消息可以變得好快,撈唔撈底就要睇個人本錢量力而為啦。

陸羽仁

hd