金融High Tea——見小底博反彈

        內地應對美國徵收關稅,先來一招硬碰,第一時間公佈反制的關稅措施,美國白宮初步反應係表明暫停再出招,表示中美雙方可以埋枱傾,市場緊張氣氛為此紓緩。

  杜指周三出現800點大逆轉,由跌轉升,如果無特別嘢發生,北京喺貿易戰採取的快打快策略後,可能第一回合已響鐘打完,呢一浪似見了一個小底,大把彈藥在手者,揀啱心水可考慮博一浸反彈。

曬完大注應會唞唞

  中國喺清明假前公佈對美國500億美元產品徵收關稅名單,消息令周三盤前杜指期貨一度下插440點,開市指數一度大插逾500點,但隨著白宮表示現時再無針對中國貿易措施,加上貿易代表署話中美兩國會繼續磋商,顯示美方暫時無意將行動升級,美股由低位反彈,倒升230點收市。

  同美國打貿易戰呢啲大事,相信北京上下都會開足馬力,呢次拍板採取快速硬碰方式,有點將特朗普打窒味道。佢見到北京咁樣反擊,都要停一停,諗一諗,然後再決定係咪加注,同內地玩落去。

  O依家雙方就好似玩緊牌局,內地擺出姿態係奉陪到底,你加注就要預左對手每一注都跟到足。呢樣嘢亦同時間有關,內地兩會已經開完,完成左憲法修改,照正路睇國家主席習近平,做完呢任好大機會再做多屆,現屆政府正進入執政穩定期,相反特朗普要應付中期選舉,過兩年就要開始部署大選,就算佢連任都唔夠習大大做得耐,喺呢個時間要開波,你話牌面睇邊個着數呢?

  打牌局好多時都唔會博到盡睇對家底牌,而係在過程中大家鬥捉心理。中國O依家擺出嚟嘅姿態,就係唔怕跟到尾鬥揭底牌,下一步就睇中國跟左兩注之後,會唔會畀特朗普殺番多少,等佢見好就收。

  正常嚟講,呢啲牌局賭注有番咁上下,應該唔會咁快玩完,但周三硬碰後,有機會大家會停落嚟摸吓底,假前港股急插600點,有可能就試左短期底部,喺呢個位會彈吓,想博反彈者可以細細注玩吓。

商場業主好過做零售

  假前個市急插,重磅科技股跟住外圍科技股跌落去,反而個別板塊炒消息,藥業股炒作內地有稅務措施扶持,另外零售股同內地建材股都炒行業前景改善。今年一、二月份本地零售數字急彈,亦係去年三月以來,連升12個月,升幅高達29.8%,遠勝巿場預期8%,合計首兩個月零售額按年升15.7%,創2013年後最大升幅。地產發展及收租股上揚,零售股好似莎莎(178)逆市造好。

  另一隻零售受惠股係九龍倉置業(1997),佢已連升三日,累升8.42%。去年九倉分拆後無乜炒過,有大行相信零售復甦係股價催化劑。中環茶友識得九倉大姐大,去年起佢已經話零售最壞時刻過左,點解佢會知呢?皆因九倉名下商場全部都同租戶拆數,所以日日目及實啲數據,做零售自己賺唔賺都要畀左租先,尤其喺啲旺場,所以零售商會輸,大商場就無得輸,零售好,咁商場股就隨時受惠過零售股。

  另一個大行睇好板塊係建材類,假前海螺水泥(914)炒上左。大摩就有報告,話業內預期制產能趨勢持續,有可能的正面增長動力,是低品質32.5級的水泥,有可能在2018年淘汰,當中新疆將會是第一個淘汰該款水泥地區,水泥價格已大幅回升;此外2017年新增產能增長下跌,預料2018年將會持續。該行亦都認為,去年水泥股盈利按年增長理想,顯示行業盈利能力;2018年年初至今亦見強勢,一月份及二月份水泥價格上升,預計2018年水泥毛利率前景樂觀,今年首季毛利率亦會較去年好。該行提升2018年水泥股每股盈利預測3%至40%,由於海螺及西部水泥(2233)有擴張計劃,多個業務部門邊際利潤率將會擴展,所以值得看好。

  陸羽仁提過可以炒上落的中國建材(3323)都係水泥行業受惠股,佢創新高後回落,低位可作博反彈之選。中美動作多多,美息又作勢向上,炒作要走位靈活,暫時揀股以內需同有息派者,風險會低啲,唔好忘記進取中不忘穩健玩法,係政治市中自保辦法。

陸羽仁

hd