金融High Tea——改行炒板塊 軟件股食正

        特朗普同內地拗手瓜,搞到全球投資者暈頭轉向,但比起俄鋁(486)受美國制裁,已經係小兒科。美國為懲罰俄羅斯被指在2016年干涉美國大選,將對38個俄羅斯個人、官員、公司和國企實施制裁,當中包括俄鋁(486)大股東歐柏嘉(Oleg Deripaska)。

  俄鋁股價即時大插50.4%,一家原本市值高達704億的公司,畀政治巨浪一下打到殘。

俄鋁踩中超級政治地雷

  俄鋁被美國制裁,即時衝擊係公司債務有可能出現技術性違約危機,即係未能符合借錢文件上一啲條文,有機會被人call loan。

  公司發表聲明,話現正評估技術性違約對集團財務狀況造成影響,初步顯示制裁很可能對集團業務及前景構成重大不利影響,同時強調目前公司在所有其他方面遵守其信貸及財務責任(包括還款責任)。由於情況突變,公司可能延遲寄發2017年度年報,並將就此盡快另行刊發公告。

  俄羅斯工業貿易部長Manturov稱,美國制裁新清單上的俄國企業,將得到額外政府支持。

  受消息打擊,俄鋁(486)上周五收4.64元,昨日大幅低開3.51元,但原來呢個時候跳船都仲有着數,因為佢全日股價下插,收市跌咗一半,收報2.3元,下挫2.34元。

  俄鋁係俄羅斯最大工業集團之一,本來公司大股東En+集團仲滿腹大計,去年就計劃在倫敦和莫斯科上市,擬集資15億美元(約117億元)。當時仲傳將會引入中國華信能源的新加坡戰略投資者AnAn Group。

  En+集團主要資產為持有俄鋁逾48%股權,以及鋁礦資源及能源項目。

  去年曾斥資90億美元(約702億元),收購俄羅斯國營油公司Rosneft的14%股權。不過,去年第四季,俄鋁主要股東Onexim Holdings及Lamesa Holdings唔知係咪聞到味,出售4.56億股俄鋁,佔已發行股本約3%。

  睇番俄鋁(486)去年業績其實唔錯,純利12.22億美元,按年增長3.65%;每股基本及攤薄盈利為0.08美元。去年經調整純利為10.77億美元,按年增長2.69倍。

  佢本來股價已經陰陰跌,再經大插後市盈率跌到去3.6倍,派息有6.7厘,以佢係全球鋁市場地位,真係大超值,俄國政府相信都會大力撐佢渡過難關。只是,美俄矛盾嚴重過中美貿易摩擦,加上特朗普通俄門超級複雜,俄鋁踩中超級政治地雷,大件夾抵食都唔係咁多人啃得落。

特朗普係股市波動之源

  特朗普成為股市波動之餘,通俄門搞到俄鋁股東喊晒之餘,佢周日喺Twitter表示,有信心中國將放下貿易壁壘,又扮話同國家主席習近平友情無損。港股周一曾升穿30500點水平,一度升669點,收報30229點,升384點。

  藍籌股滙控(005)成為支持大市的重點股,上揚1.6%,收報74.2元,貢獻恒指46點升幅。重磅股騰訊(700)收升1%,報410元。兩隻內需股萬洲國際(288)升3.9%,收造8.35元;蒙牛乳業(2319)上揚4.6%,收報27.45元。

  大市似乎怕咗特朗普式波動,改行炒個別板塊,藥業股外,軟件股都當炒,金山軟件(3888)收升4%,報25.2元,佢已經升得算少,金蝶(268)大升13%,報9.03元,中國軟件(354)升7%,報7.28元,中國擎天軟件(1297)大升25%,報3.37元。

  軟件股業績過得去,加上受外貿影響唔太直接,變成炒反彈市落注對象之一。在政治市中,大家都迫住炒股唔炒市了。

陸羽仁

hd