金融High Tea——趁特朗普波動市搵食

        港股喺期指結算日插低,一度跌破三萬關,跌市解釋特別多,一大因素係美國再出招,話要對中國500億美元貨品徵收25%關稅。港股呢啲跌法,可以歸納為「特朗普波動」,又係搵食好時機。

  插低個市的理由仲有其他,好似意大利出現懸峙政局,可能要再搞大選,外界擔心會觸發政治危機,歐羅兌美元插低。歐洲政局對香港而言影響唔係咁直接,市場更關心係白宮突然表明,六月起會陸續向500億美元中國貨開徵關稅,以及實施投資限制,個市低開後跌勢加劇,加上有期指結算因素,同時都借呢個消息造淡。

上證近3000點可撈

  市場對於白宮表態,似乎有啲過份認真。正如早前中美貿易談判後表示達成共識,雙方話唔會打貿易戰時,陸羽仁認為唔需要過份重視,與其高追不如等佢再嗌交回調時才低吸。現時白宮翻臉,好大機會又係談判技巧。美國商務部長羅斯星期六開始訪華,討論削減貿赤執行聲明細節,白宮言論有爭取談判籌碼味道。另一個白宮發狠原因,係特朗普仍然計劃同北韓領袖金正恩會面,喺呢場政治大騷前,國家主席習近平搶閘見了肥仔金,特朗普酸溜溜地話習主席係「世界級的橋牌高手」。O依家美國喺貿易爭議上發作,都有迫中國發功,令特金會可以順利舉行味道。美國商務部長仲會同北京開會,到時又唔知有乜嘢變化,喺投資上就唔使咁認真去睇白宮的言論,甚至可以將特朗普視為「股市波動之友」。

  中美貿易戰成為全球議題,國際貨幣基金組織(IMF)工作小組表示,本月訪問中國後,維持對中國今年經濟增長6.6%預測不變,預料至2023年經濟增速將逐步放緩至5.5%左右。國基會駐華代表席睿德指,貿易摩擦為中國經濟帶來下行風險,呼籲各方共同合作,紓緩貿易緊張形勢。

  特朗普就你有你緊張,佢有佢打亂章,股市就跟住佢舞。睇番恒指昨日走勢,O依家仍然維持喺28500同31600點之間波動的上落市形態,如果大市再跌穿三萬點,咁又不妨買吓股,目標唔好太貪心,執番千零點都已經幾唔錯。

  同樣,受中美貿易摩擦衝擊,滬深股市收市跌逾2%,滬指連跌六個交易日,跌至逾19個月低位。上證指數收報3041點,跌咗79點;深成指數收報10105點,下滑243點,去到呢啲近3000點關鍵心理位,又係可以買吓博反彈機會。下個月除咗A股入摩外,港股有唔少大公司除淨。去年本地大公司業績普遍靚仔,個別股份派送唔錯,股民不妨擇肥而噬,好似今年又有10送1紅股的恒地(012),呢排股價好硬淨,昨日收報51.15元,若然唔怕樓市炒爆,可以吼佢6月5日除淨前有無機會跌近50元關口左右入貨,等收1.23元股息同紅股。

豐德麗繼續炒上

  港股昨日曾下試全日低位29964點, 一度大瀉520點,收市險守三萬點關,報30056點,跌咗427點;國企指數收報11769點,跌189點,成交增至1098億元。股王騰訊(700)失守400元關,以全日低位收市,收報395元,跌1.7%,拖累恒指49點跌幅。內銀內房股受壓,碧桂園(2007)申請發行200億元人民幣熊貓債遭叫停,股價跌2%,收報15.18元;富力地產(2777)暫停發行一批債券,股價挫3.3%,收報18.14元;工行(1398)跌2%,收報6.41元;中行(3988)挫1.7%,收報4.06元。

  碧桂園(2007)宣佈咗以介紹形式分拆碧桂園服務獨立上市,股東每持有8.7股碧桂園,可以獲分派一股碧桂園服務。碧桂園服務總股數為25億股,每手1000股,計劃下月19日掛牌。呢排其實內房物管股幾當炒,好似雅居樂分拆出來的雅生活(3319),逆市升近4%,收報13.9元。同一板塊的彩生活(1778)及綠城服務(2869) 分別升6%及0.6%。

  幾隻新股首掛,人氣最旺的叙福樓(1978)逆市上揚,收報1.54元,較招股價1.1元上升40%,一手2000股帳面賺880元。提出咗私有化的豐德麗(571)繼續炒上,一度升10.71%,見1.55元;收報1.51元,升7.5%。

陸羽仁

hd