金融High Tea——內銀股東要留意特金會

        中美雙方貿易談判無撕破臉皮,雖然中方態度強硬,但結果無預期咁差,恒指開市就造好,結果全日大升逾500點收市。美國媒體話,特朗普可能會針對內地銀行高層發出制裁,亦未見影響市場氣氛。

  過去兩日放假,一、二手樓成交增加,二手屋苑繼續創出新高。最新數字話地產代理有接近四萬人,差唔多要五個人爭一張單,雖然搵食艱難,但代理人數有增無已,皆因樓價高,做一單已夠食幾個月。經濟向樓市傾斜,好多人都話擔心,財政司司長陳茂波跳出來再示警,直言樓價超過97年1.2倍,大幅超出市民負擔,話樓市供應增加兼且利率向上,大家買樓要留意風險。

空置稅等特首發落

  財爺呢啲論調唔係新說法,但除咗等覓地小組個個星期去探吓劏房戶,政府始終無乜招出。財爺喺年初宣佈預算案時,曾經有消息話佢會推出空置稅,但最後只聞樓梯響,聽聞措施喺最後關頭俾內部叫停咗,理由係過去幾年都已經出咗唔少辣招,但唔見得有乜效果。喺政府無招出下,樓價就愈升愈高。

  波叔昨日提到空置稅,話已經進入最後階段,口氣同過去有啲唔同。聽到茂波話一手樓空置稅研究已近尾聲,會盡快公佈研究結果,並指興建好但未出售的一手樓盤單位約9000個。地產建設商會執委會主席梁志堅即刻撲出嚟回應,佢堅稱未見囤積單位成為市場趨勢,認為政府引述數字未能反映實際情況,實際上空置單位可能只有約3000個,因為當中有不少單位涉及等待交樓或取得滿意紙,政府不應單憑發展商取得入伙紙,就判斷單位屬空置。佢仲爆料話,商會曾經開會討論相關問題,現時正核實有多少單位,屬於取得滿意紙後一年仍未售出,會盡快公佈有關數字,但相信數量十分少。一手空置稅係咪出台,我去收吓料,發覺O依家主要睇特首林鄭,樓市不斷升溫,不能排除林鄭扭扭軚,突然有一日由她出來公佈搞一手樓空置稅。不過呢個建議太惹火,亦不能排除出閘前一刻俾人射低,只能講句「等候特首發落」,所以炒地產股,要預埋空置稅呢個風險因素。

  樓市高熱未退,市場繼續搵啲有樓賣的二、三線地產股短炒。宏安地產(1243)發盈喜,股價急漲一度升21%,見1.37元近半年高;收報1.29元,升14%,市值去到196億。集團預計截至三月底止,全年純利將按年增長不少於40倍。該公司去年盈利3881.6萬元,每股盈利0.26仙,照咁計有15億幾。

宏安食正納米盤熱潮

  宏安老闆係街市大王鄧清河,有中環茶友同佢好熟,笑言佢O依家轉型成功,做咗「納米盤大王」,公司早幾年投咗幾塊平地,佢發現納米盤市場需求好大,於是搞咗一系列樓盤。佢仲親力親為,由開積到起樓都自己睇住。由於納米盤價錢賣得好,所以佢唔怕加注,去年集團與地政總署,就油塘四山街13及15號重建項目土地補地價達成共識,補價9.8億元改建,轉手就以7.1億元賣咗五成權益。另外集團陸續買入幾個地盤,實行密食當三番。「納米盤大王」喺呢十幾年,由做街市到買街舖,跟住轉型做發展商,O依家專攻納米樓,呢啲叫做時勢做英雄,亦係英雄做時勢。

  恒指昨日一度重上31000關,高見31012點,收報30997點,升505點,國企指數收報12249點,漲229點,成交1035億元,恒指新貴石藥集團(1093)升3.2%,收報25.55元。

  雖然美國傳出一張中資銀行同北韓有交往清單,針對相關銀行高層,暗示若然特金會無好嘢,可能會燒埋呢的內銀。被美國傳媒列出可能受美國總統制裁高層,分別來自建行、農行、中信銀行、郵儲銀行、招商銀行同工行。唔知大家係咪覺得特朗普花臣太多,市場暫時無乜強烈反應。內銀股建行(939)漲2.39%,收報8.15元;工行(1398)上揚1.7%,收報6.62元;中行(3988)漲1.45%,收報4.19元。雖然內銀股未見腳軟,但如果特朗普將佢哋同北韓局勢掛鈎,咁內銀股東可能都要睇住特金會有乜料到。

陸羽仁

hd