金融High Tea——科網棚靚有利抽水

        港股繼續造好,在外圍科網股帶動下,手機設備股同本地科網股跑贏大市。好似掛牌時麻麻哋的平安好醫生(1833)獲摩通首予「增持」評級,目標價68元,股價揚近10%,收報51.95元。其他科網半新股易鑫(2858)由上市低位急彈,股價飆14%,收報4.27元;雷蛇(1337)揚8%,收報2.39元,有強大阿媽背景的閱文(772)喺上月跌穿60元後似乎見咗底,持續反彈到78元,昨再升2.3%。

  本地科網股造好,主要係跟住外圍炒。但香港改咗接受同股不同權公司上市後,會令科網股供應增加,中線會影響資金供應,不利估價,但同時投資銀行家亦要搭靚個台方便集資,所以外圍造好,正係整靚個棚的時候。

美團創辦人來港密斟上市

  來港掛牌集資的科網股,除咗講到開巷的小米,啱啱又傳出內地送外賣的科網公司美團正在起草申請書,計劃最早於今年九月在香港IPO,集資估值高達300億美元,數字相當驚人。仲有消息話,美團創始人王興上周飛往香港,與銀行家們就該公司提交IPO計劃進行商討。據美媒透露,美團希望爭取到600億美元估值,集資所得會用來拓展打車、共享單車等新服務,同埋喺國內外進行併購等。

  美團O依家想同另一間大把錢的打車巨人滴滴出行鬥燒錢搶市場,所以想上市集資。由於滴滴已經對美團發起反擊,在某些城市推出食品快遞服務與其競爭,並推出自己的共享單車平台。同樣,滴滴都講緊嚟香港上市,所以惡鬥多年的打車市場,未來必定仲係鬥融資鬥燒錢戰區。

  網企進入大撼大時代,佢哋既燒錢鬥搶客,同時鬥喺市場賣概念抽水。好似美團號稱「服務界的亞馬遜」,但佢嘅對手除咗滴滴,仲有阿里支持的外賣公司餓了麼,所以如果唔能夠上市集資,基本上佢哋好似打仗無糧草,未埋身肉搏都知道無得打。

  香港O依家開咗個井,於是大家都搶嚟呢度飲水,O依家屈指一算就有滴滴、美團、小米同螞蟻金服。雖然全球投資者O依家對科網股興趣似乎未散,但好多人都覺得,美國如果繼續加息,全球股市老牛唔知幾時玩完,上市窗口一旦關閉,無錢燒的公司就隨時蒸發消失,所以有機會就要不惜工本,快手抽水。基金大戶不是省油的燈,睇到呢個局,都開始對新上市科網股估值有啲質疑,所以唔搭好個棚,仲難攞到好價錢。

科網力撐 大市成交跌

  美團話上市,有同佢合作咗幾年做外賣的餐廳小商戶就出來插佢,話過去美團代客送外賣服務好、收費低,三公里路程送餐時間基本只需半小時,但現在約滿後美團就要商戶做獨家專送,不專送就在網上關他們的店,而且抽成從最低的四元提到五元,最慘係等一個鐘都唔見配送員來取餐。講真,當初美團同小商戶合作,條件好到不得了,根本係蝕畀佢,而且仲唔係小蝕而係大蝕,等佢做大咗自然係鍊你,呢個係科網巨企慣用伎倆。

  同一個道理,喺未上市前科網股搭個靚棚,等散戶炒作吓,覺得科網股好有前景,然後先可以集大錢,計落一樣除笨有精,所以散戶食吓呢個概念短炒,就同小商戶搞網上生意一樣,食咗甜品先,至於日後得唔得就要各自修行啦。

  港股就喺騰訊同手機股帶動下造好,恒指收報31259點,升咗165點;國企指數收報12283點,漲24點,但成交減至974億元。騰訊升1.2%,收報425元;瑞聲科技(2018)可能受惠蘋果呢排強勢,急升9.3%,收報131.9元;舜宇光學(2382)急漲5%,收報168元。

  其他好似高偉電子(1415)飆16%,收報2.17元;從事分銷晶片業務的光麗科技(6036)大漲40%,報收0.62元。

  蘋果股價強勁,主要係公司手機邊際利潤增加同程式收益帶動,但出機量似乎唔係咁多,所以對設備供應商係咪咁利好呢?可能睇埋季績就會清楚。

陸羽仁

hd