金融High Tea——息口趨升 不利齋炒

        特金會前夕,美股三大指數平穩,似乎仲係睇緊美國開會議息結果,市場預計加息機會係百分百,只係睇會後聲明會點講息口前景。特金會在港股時段完美結束,但對港股無甚刺激,只是微升39點,都唔係好升得起。

  儲局新主席鮑威爾上場後唔高調,外界對佢鷹鴿取態,感覺唔算太明顯。佢未上場前,外界感覺佢比上任主席耶倫喺通脹問題上強硬。睇番O依家美國就業同通脹數據,增長勢頭仍然強勁,美國息口唔可以太軟,若然太軟可能仲快爆煲。O依家總統特朗普四出攻伐,提出美國優先,實情美國就業情況已經係近二十年最好,無乜需要用咁極端手段去增加工作機會,只係政客用呢招可以拉到選票,咁又何樂而不為。

比特幣又急插

  美國息口短期前景唔會太軟,代表資金成本唔會回落,呢個趨勢等如增加咗炒賣成本,對啲無乜回報純炒作的投資或投機品自然構成壓力。喺美國議息前夕,比特幣一度急跌13%,低見6635美元,續創兩個月低位。其他虛擬貨幣都大插,以太幣最多曾插16%,低見502美元,比特幣現金昨更大瀉兩成,最低曾報897美元。比特幣自從今年初大幅回落,一直處於弱勢,趨向有反彈無上升,資金成本上升,削弱咗呢類無息口回報產品的吸引力。

  利率趨勢同時支撐咗美元,加埋七國集團(G7)峰會,特朗普可能見加拿大總統杜魯多靚仔過佢,所以狂插呢位政壇小鮮肉,搞到加元急插,美元兌加元昨最多曾升0.8%,高見1.3028,所有呢啲形勢,似乎都反映資金有百川匯海,流向美國跡象。

  呢個星期鷹君爭產官司打到街知巷聞,呢種場面當然可免則免。理文系公佈股權重新分配,市場理解就係分身家。原來,理文系由李運強持有兩間上市公司控制權。他持有理文造紙(2314)56.88%股權,長子李文俊與三子李文斌,分別持有6.35%及6.93%;李運強將大部份股票轉給兩子,李文俊與李文斌最新持股量分別為30.47%及28.32%,李運強保留11.38%。至於理文化工(746),李運強與兒子李文恩本身各持有41.25%及33.75%,李父將近半股權轉給兒子,兒子變相增持至60%,李父則保留15%股權。咁即係老父在兩間公司都退居小股東位置。

  理文糸由第二代打理公司已經一段時間,市場對消息反應平靜,相信可見將來股價都會跟住生意走。

理文股價落後紙價

  去年年底開始,紙價大幅上升,本來估計紙張價格咁鬼高好難維持,結果卻出乎意外到O依家都高居不下,紙廠亦可以調高售價。有用家喊晒口話,就算落咗單都未必收到貨,佢話紙張價格急升,一來因為內地收緊環保要求,削減廢紙進口配額,令廢紙供應短缺;亦有啲紙廠趁機減產谷高價格。好似理文呢啲大廠,應該成為贏家。

  理文O依家市盈率八倍,息率逾四厘,數字上有一定吸引力,不過紙價高能否維持始終有疑問,所以理文造紙股價跟唔足紙價升幅,後市都係適宜低吸為主。理文造紙昨日收升0.8%,報8.26元;理文化工收報6.61元,升0.9%。

  大市無乜方向,恒指最多升179點,高見31242點,但一度掉頭跌近120點。恒指收市報31103點,升39點;國企指數報12206點,升34點;大市成交額877億元。世界盃即將開鑼,內需及消費股繼續爬升,美銀美林提升華潤啤酒(291)目標至42.6元,維持「買入」評級,股價收市揚7%,報38.5元。青島啤酒(168)升2.4%;統一(220)創逾五年高,收市升3%;頤海國際(1579)創新高,收市升6.5%。

  華潤水泥(1313)雖發盈喜,但同時宣佈以每股9.3元先舊後新配售4.5億股,集資淨額41.8億元;股價以全日低位收市,報9元。水泥業今年境況唔差,潤泥走勢唔錯,佢即刻趁高配股。內地今年水緊,加上好多科網股集資,公司有機會自然抽咗水先,潤泥的做法相信會陸續出現。

陸羽仁

hd