金融High Tea——中興內傷無謂博

        美國總統特朗普同北韓領導人金正恩會談,雙方會後發表聲明,無乜驚喜亦無乜料到,本來呢個係預期之內,所以美股無乜反應。不過美國佬定一定神,就開始柴台,質疑特朗普俾人「過左一戙」,初步睇嚟兩大政治騷高手過招,特朗普為求有成果先鬆一章。

特金會有得威無錢搵

  特朗普同金正恩埋枱傾,最後無宣佈韓戰結束,美國主流輿論受精英控制,唔太畀面,認為特朗普攞唔到嘢,開始出現噓聲,之後聽到總統話停止美韓軍演,反彈之聲仲大。

  有中環茶友話,美國從來都係好戰份子,O依家乜都未有就話唔軍演,咁美國啲過期武器點搞先。共和黨係軍火商戰略夥伴,從來無話要和平不要戰爭,若然話連軍演都唔使搞,咁日本南韓仲使乜買武器?特朗普可能太想喺歷史留名,所以俾肥仔金攞左好處。

  雖然O依家北韓好似佔左少少便宜,但茶友話大家唔使擔心,因為對特朗普嚟講,反口唔係問題。今日佢先攞左威,做左歷史大騷,明日可以推翻晒所有承諾,所以大家唔需要咁認真,所以話半島和平,真係長路漫漫,有排未到終點啦。

  特金會呢啲政治騷,對美國佬嚟講係出風頭但搵唔到錢,唔似搞吓俄羅斯、搞吓中國可以攞到着數。好似美國制裁中興通訊(763),搞完一輪至少罰左佢10億美元。中興休克後醒番,復牌股價唔見左42%,收報14.96元,基本上佢由開市就插低,無乜點反彈過。有中環茶友問佢插得咁殘,係咪已經反映左佢俾人罰10億美元的壞消息呢?言下之意係咪可以趁佢大插兜底呢?

  通常如果好似中興呢啲公司急插,一般都會有反彈,但今次佢俾美國佬玩得好傷,而且仲有好多後遺症。表面計數,佢俾美國罰款數字,等如係一年利潤。未俾人罰之前佢做緊15倍市盈率,被人罰完如果股價無變,咁咪做16倍市盈率啫,但O依家跌到11倍市盈率,感覺真係好抵買,但如果諗深一層,就唔係咁簡單。

  首先,中興俾人罰左一年利潤,以佢原先估值大約跌6至7%已經足夠反映,但佢今次俾人罰,係因為同伊朗呢啲受制裁國家做生意,佢俾人打完屁股,相信都唔敢再嚟,而呢啲國家生意可能本來利錢最深,所以佢利潤好有可能會減少,令佢估值再跌。

  不過,美國最辣係要求撤換管理層同派人監管公司。經此一役,相信新管理層都唔敢咁進取做生意,最重要係俾美國睇住,你話佢會唔會俾你做大做強,以至於賺大錢呢?所以從牌面睇,中興今次達成和解協議,只係能夠保持生存條件,但唔死一身孱,可見將來都好難賺到大錢,皆因美國已經盯上呢間公司,覺得佢係一間戰略上不能讓佢壯大的科技企業。從阿爺嚟講,保住中興叫做保住5G優勢,賺錢與否已經唔計較得咁多。

  從技術層面睇,中興擁有一定競爭力,客戶唔易搵到替代供應商,一般人唔係咁易搞得死佢,但O依家係國家之間的角力,情況又有啲唔同。對中興小股東嚟講,未來最好係國家將中興私有化,但呢樣嘢應該短期唔會發生,O依家個價亦唔算好低殘,所以如果從投資角度講,有咁多股好買,睇唔到點解一定要博佢。

小米好事近 拉唔郁騰訊

  十個牛皮九個淡,中興爭取到復牌,但就撞正個市回落,港股尾市跌幅加大,恒指收報30725點,下挫377點,國企指數收報12035點,跌170點,成交只有844億元。雖然市傳小米上市好事近,CDR反應唔錯,但科網股騰訊(700)仍然受壓,跌0.5%,收報415.2元,反而晶片股繼續熱炒,中芯(981)急升4.6%,收報11.28元。

陸羽仁

hd