金融High Tea——單日轉向 唔怕攬炒

        美國傳出話針對中國投資美國科技公司設限,結果變成「攬炒」,中港股市急插後,美股都受累下跌,杜指收市跌咗328點,代表科技股的納斯達克指數跌160點,論幅度納指跌幅超過2%,比杜指跌幅為大。

  正如陸羽仁所講,中美打架大家攬炒好過中國獨捱,美股大插,港股開市雖然有啲恐慌性拋售,但單日轉向,一度轉升,最後微跌收場。

  攬炒好過獨捱,道理好簡單,如果美國向中國施壓,美股一啲事都無,咁政客又點會收手。如果美股跌埋一份,雖然邏輯上會拖低中港股市,甚至觸發環球實體經濟有倒退威脅,但大家都有代價,咁先至有坐低傾掂佢嘅誘因。好似傳出咗美國對中國投資設限,華爾街出現拋風,美國官員即刻走出嚟降溫,總統特朗普帖文話係假新聞,質疑啲料係知啲唔知啲。

美股樣衰 官員補鑊

  從美國政府上下口徑不一,畀人感覺係空穴來風,只係消息惹來咁負面嘅反應,總統以至官員就各自執生,為事件降溫,但唔同人有唔同版本,睇嚟係本來都有呢個想法,但見到勢色唔對,大家就即刻縮,證明若然打出嚟係七傷拳,傷人之外都會傷己,咁美國佬都會有啲忌憚。

  另一個例子就係美國加徵歐洲鋼鐵稅,電單車生產商Harley-Davidson話考慮將生產線搬去歐洲,即刻搞到特朗普要解畫,叫其他企業要忍耐。

  由兩個例子可見,西方政客點講都好,始終都係怕痛,而股市下跌正係令到佢哋痛嘅其中一個方法,所以貿戰有開火消息,最驚係美股無反應,美股跌反而對中港股市唔係咁壞。美股前晚擔心中國可能喺貿易問題報復大插,港股開市早段曾急挫456點,低見28505點,再創今年新低。不過,恒指收報28881,全日仍跌79點,國企指數收報11118,跌90點,走勢有啲似過山車,雖然最後唔能夠扭跌為升,都有小小單日轉向味道。市況波動,「即日鮮」交易頻繁,大市成交回升至1248億元。

  大市見28505點,向下行落一大級,當然好難睇好,即使彈1500點都係剛好見30000點,之前嘅支持位,變成如今阻力位,個市有啲啲樣衰。

  貿易陰霾籠罩前景,美國聯邦儲備局開口關注會否影響投資,資金流入公用股避險,中電控股(002)上升3.2%,成為表現最佳藍籌股,電能(006)升1.3%。市場盛傳中國鐵塔即將上市,部份內地電訊股逆市向好,中移動(941)升1.2%,中電信(728) 更升1.7%,其他表現好啲股份主要係收租股一類防守性股份。市場憧憬內地將扶持晶片行業,相關股份再現強勢,華虹半導體(1347)急升9.8%,再創新高,中芯(981)升3%,先進半導體(3355)亦升5%。

借孖展抽獎要防上身

  大型新股小米(1810)上市,本來市場預備大量資金作孖展。從昨日拆息偏軟睇,認購反應會比預期淡靜,同系嘅金山軟件(3888)都下挫4%。拆息低好處係利息成本輕,有人認為咁樣會減低咗賺息蝕價嘅風險,但咁同樣代表咗借孖展上身風險上升,所以借錢買股要小心。由認購反應睇,呢隻股短期投機嘅空間有限,如果中長線睇好隻股,可以用實資認購,就算攞唔足,等佢掛牌買都唔會貴好多,畢竟由截止認購到掛牌有一段時間,市況唔知點變,借孖展買大咗到時被迫斬倉,咁就無仇報啦。

陸羽仁

hd