金融High Tea——內航股中雙錘

        美股反彈,但港股唔跟。美股反彈主要係受科技股帶動,以及油價上升造好,美國官員出口術奏效,紓緩咗市場對限制中國投資科技公司的憂慮,美股企番穩。但香港和內地市場似乎驚特朗普繼續出招,中港股市雙隻腳軟,港股大插525點,上日單日轉向的氣勢無晒,再見近期低位。

  港股深度踩穿250天線29332點,令人害怕熊市再來。我認為即使唔理牛熊,大市走勢咁弱,點都要轉打守勢波。首要不要不斷溝貨,以防愈陷愈深。其次若買股要作長線準備,買派息較好的大股,唔好買講概念的中小型股,因為萬一睇錯市,長揸都有息收吓。

  特朗普呢排行運一條龍,佢民望大升,更在限制伊斯蘭移民的官司勝訴,氣勢大盛,想佢收手真係唔易。但中國領導人習近平亦唔係遇難就縮的人,成為兩大經濟體的正面博弈,習主席見美國商家就講明,中國人不是俾人打完一巴,會畀另一邊臉俾人打多一巴。

  究竟中國仲有乜招數可以出,去化解美國連番施壓呢?投資銀行高盛認為,中國應對美國貿易衝突惡化時若容許人民幣貶值,將較出售持有的大量美國國債對中國更好。高盛分析團隊模擬計算,若人民幣貶值5%,將拉動中國經濟增幅0.4個百分點,認為這個做法遠較拋售美債更容易被接受。

油股板塊成逆市奇葩

  高盛做呢個分析,唔係坐而論道,而係有實際操作價值的投資參考。如果佢哋估中國會大量拋售美國國債,最明智策略當然係搶先沽空,飲其頭啖湯,若然佢哋覺得人仔會跌,咁可以沽空人仔等低位平倉,同時仲可以沽埋人仔貶值不利股。高盛團隊覺得大陸沽售自己大量持有的美債,因為自己手上持有美債仍多,咁做等同拆自己台,係雙輸做法,反而讓人民幣貶值仲好,推低匯價幫番自己出口。睇番離岸人民幣跌至6個月低點,本月以來人民幣兌美元已下挫2.3%,跌幅超過2015年8月匯改時近2%的一次性貶值。

  內地以貶值應對貿易戰,呢個唔係高盛獨有觀點。睇番上世紀八十年代日本冒起,美國係廣場協議迫令日圓大幅升值,結果一鋪打殘日本,令佢衰退咗30年。有咗前車之鑒,O依家中國唔肯再接受美國的城下之盟,美國加徵關稅兼施加其他限制,必然影響大陸增長,北京容許人仔貶值,令佢持有美債匯價上得益,同時紓緩加稅對中國出口貨的影響,可以話係合理發展,所以人仔匯偏軟係目前的正常預期,中美如果傾得掂,到時人仔匯價先至會企穩甚至上升。

  係人仔匯價暫時唔樂觀下,有外債的公司難免受壓,內航股係當中突出類別,因為佢哋買飛機借落好多外債。匯價不利加上油價上升,令內航股中雙錘,幾隻主要內航股都迭創一年低位,國航收報7.42元,再挫5.5%,同一年高位12.86元比,回調幅度達42%。另外南航跌6%,收報6.32元,高位回落幅度同國航相若;東航收報5.54,跌咗2%,高位回落咗25%,反映佢基本業務較佳。內航股如果高位無走,O依家有啲走避不及之感,好多人都會選擇死坐。不過,有貨死坐唔代表無貨要入貨,皆因內地大陸公司係唔會做期油對沖,油價高佢哋多數要硬食,所以唔排除要捱價。

  美股唔跌,A股就再瀉,上證綜指跌2800點,當中消費股成為重災區,油股板塊就成為逆市奇葩,最後上證收報2813點,跌咗31點,深成指數收報9168,下挫170點。A股唔得,港股下午跌幅擴大,恒指收造28356,急插525點;國企指數收報10879,跌239點,成交1213億元。騰訊(700)大跌2.2%,收報377.4元,內房股都受人仔匯價壓力,碧桂園(2007)挫7.4%,收報12.74元;融創中國(1918)急插8.7%,收報25.3元。同大陸一樣,中海油(883)逆市升3.2%,收報12.98元。

太和有前一哥坐鎮

  喺跌市下只有特別情況的股份能夠上升。冷股太和控股(718)計劃向母公司出售持有大酒店(045)11.5%持股,每股售價12.8元,較大酒店上個交易日溢價12.5%,料可獲得收益約2.2億元,所得用作派特別息,消息刺激和昨早大漲,曾高見0.84元,飆25.4%,收市報0.81元。由於大股東持有近75%股權,安排等同公司將大酒店股份轉畀大股東,過程中小股東都有啲着數,不過呢類派資產唔會安全反映派發價值,所以想炒除淨最好等回落返啲先。

陸羽仁

hd