金融High Tea——7.6之前市敏感

        港股假後出現驚嚇性急插,其後跌勢稍為喘穩,總結市況就係八個字︰成也人仔,敗也人仔。

  七月開局,港股復市唔靚仔,已經喺預期之內,皆因外圍市況唔多掂,A股喺周一香港假期時下插,但恒指昨日低開後,人仔急插,港股一度插近千點,都有啲出乎意料,港股跌勢有雪上加霜感覺,誘因應該係同人民幣匯價偏軟,好多對人仔匯價敏感股份好似內航股大插,其後內地人行官員出口術力撐,市況先稍為回穩。

徵稅埋牙人仔先插

  中美貿易戰高溫不退,中國經濟同出口受壓,匯率自然唔掂。中國外匯交易中心公佈,人民幣兌美元昨日即期盤中曾跌破6.72元關,急挫超過500點子,創近11個月新低,要人行官員發聲支撐匯價。全日仍然收跌182點子,報6.6672兌1美元,為去年9月28日以來低位。

  出口術維穩嘅係人民銀行行長易綱,同埋副行長兼國家外匯管理局局長潘功勝,佢地喺出席論壇時力言,人民幣匯價彈性增強之餘,中國經濟增長基本面良好,國際收支整體平衡及外匯儲備充裕,稱人行有充足政策工具,有信心保持人民幣在合理均衡水平基本穩定。

  傳統上七月份係基金下半年重新開局時間,購買力重新出現,造好機會大啲。今年七月開局未見翻身,一大負面打擊係7月6日美國對華340億美元產品徵收關稅就開始實行。雖然徵稅措施早就公佈,市場消化咗部份消息,但始終時辰未到,大家期望有轉機,O依家距離實施日期得番幾日,大家對埋門解決漸漸失望,市場開始體現不利影響,怕內地經濟會受影響。按照呢個時間表去睇,唔排除喺7月6日生效前,市場仲有一波波暗湧出現。

  人民幣匯價受壓,人行官員出嚟護價,中環茶友問點睇?我覺得阿爺根本唔係咁想挺住人仔匯價,不過見到跌得太急,就出嚟講兩句。過去中美貿易關係良好,美國希望人仔升值,雖然咁樣不利中國出口,但每次兩國高層官員會面,人仔匯價都會上升,中國過去要做個樣畀美國睇,整體大方向都維持緩慢升值。

  O依家中美關係鬧僵,人仔匯價無咗兩國講數共識,從經濟層面講,人仔近年升到咁高,本來都有壓力,呢個都係內地產業要轉型升級原因,O依家因為工業轉型同美國正面衝突,發展前景受壓,內地無論從能力以至主觀意願,本來已經好難硬挺人仔匯價,加上匯價貶值係對應美國加關稅最好方法,如果中美貿易關係無改善,暫時就睇唔到人仔匯價有轉番穩條件。由於月頭中美兩個徵稅進入埋牙階段,市況好難明朗,個市壓力唔容易完全消除。

內航股兩大壓力未消除

  人民幣貶值速度加快,內房內航股受壓,中港股市同步急挫。不過,人行官員言論紓緩市場緊張情緒,A股率先反彈。上證指數收報2786點,升11點;深成指數收報9221點,漲41點。港股一度跌穿28000點關,大跌964點,市況喺下午跌幅收窄,收報28545點,跌409點;國企指數收報10872點,下滑200點,成交增至1330億元。

  上周末內航股跌勢加快,陸羽仁話未係時候低撈,昨日呢個板塊再插,南航(1055)收報5.86元,跌5%;東航(670)收報5.06元,跌4.7%;國航(753)收報7.22元,跌4.8%。雖然內航股在日中低位反彈唔少,但未來表現好睇油價同人仔,兩大因素衝擊唔似咁快完,所以撈貨係高風險行為,不適宜一般散戶,如果成功撈底都適宜有胡快食。

  另一個跌多過大市板塊係濠賭股,解釋係受累世界盃賽事仍在進行,六月澳門博彩收入較預期為差拖累,濠賭股表現向下,銀娛(027)及金沙中國(1928)為表現最差藍籌股頭兩位,銀娛收報56.8元;金沙收39.35元,都跌多過6%,合共拖低恒指50點。早排同個賭王級老闆傾偈,佢都話自己都要睇世界盃,所以呢個因素應該預咗,只係之前濠賭股跌得唔多,O依家搵個理由插落嚟啫。

陸羽仁

hd